نصايح أبوية من دكتور تغذية

 

إعداد: زهراء🌹

ولأن أغلب متابعين الصفحة سيدات وامهات، قولت اكتبلكم كام حاجة كده وربنا هو الحافظ، يحفظ أولادنا جميعا، بس ناخد بالأسباب:

قبل ما اقول النصايح أحب افكركم، أن السمنة أكتر حاجة تدمر مناعة ولادنا. وتزود النشاط الالتهابي في جميع أجهزة جسمهم.

نبدأ نصايحنا ونقول بسم الله

◇ ماتسبيش الولاد من غير حموم خالص طول البرد، ومتحميش ابنك عمال علي بطال والنبي، خلي الحموم عند اللزوم، ويكون بالليل وعلى السرير وينام علطول ميخرجش بعدها.

◇ شرب الماء قبل الخروج من البيت دا شئ أساسي الصبح أو بالليل، وبلاش طشة الوش بالمية، هي اللي ممكن تتعبه والله، وأهم شئ السوايل الدافيه ثم السوايل الدافيه ثم السوايل الدافيه، ثم السوائل الدافية كمان مرة.

◇الطفل وهو نايم بالليل يلبس لبس كامل، وتقيل لأنه مش بيتغطي ولو اتغطي بيكشف الغطاء، وحياة ربنا وانتو عارفين ده كويس، بيكشفه ولا لا؟، بتضحكي على نفسك ليه؟

◇ تهوية المنزل يوميا في الوقت من 10 صباحا الي 1 ظهرا علشان نجدد هوا البيت لازم، عشان ننقي الجو وندخل هوا نضيف، بلاش ننام للضهر، ونهويه العصر والشمس مروحة، إحنا ما بنصدق تطلع أصلا في الشتا..

◇ لو عندنا أطفال رضع، أو بيعانوا من حساسية وازمات صدرية، وفي حد في البيت بيدخن، ياريت يدخن بره البيت، وأول مايدخل يغير هدومه، وياخد دش، لان الدخان ليه أثر سلبي علي كل الاطفال، وبلاش نطنش أيها الرجال، ونسمع زوجاتنا الأعزاء الموال العظيم بتاع (خليكي في نفسك، أنا عارف بعمل ايه كويس، خليلك النظافة، والجو ده) عشان خاطر ولادك ياعم انت وهو، انت حر ع راسي بس مالم تضر، ولا ايه؟

◇ الموز والتفاح والبرتقال الكيوي والفراولة والجوافة والخضار طبعا بيقوو المناعة أكثروا منهم للأطفال في الشتاء.

 

◇ الكمثرى والبلح كلهم فيتامين سي وحديد يقوو دم ابنك ويزودو المناعة جدا.

◇ معلقة عسل نحل علي علبة زبادي يوميا تقوي المناعة، وزيت الزيتون مع الثوم المفروم على طبق السلطة المتين كل يوم اساسي وتفتح النفس علي الأكل، اصبروا على العيال شوية هيحبوها في الآخر، الموضوع صعب عارف، وعايز بال طويل متأكد. ما هي الأمومة مش ساهلة، بس مستاهلة.

◇ لو انتشرت العدوي في الجو قعدي ابنك من المدرسه، مش تستني لما يتعدي، و لو ابنك تعب قعديه من المدرسه علشان ميعديش حد ، بلاش افورة والنبي، العلم مش مقطع بعضه للدرجة دي.

◇ لو الجو برد شديد أوي وفيه مطره، ابنك مش الثانويه العامة، اصلا بتوع الثانوية مش بيروحوا. وأغلبهم مقضينها أون لاين. يعني قعديه من المدرسه عادي خالص جدا، بطلوا الاهتمام المبالغ فيه من غير داعي.

◇ ابنك عنده حساسيه او معندوش حساسيه، بلاش يلبس صوف أو يلعب بلعب الدباديب والحاجات اللي بتعبي تراب وبتكون مركز للجراثيم والفيروسات .

◇الموضه اليومين دول كل واحدة مربية قطة بفرو، في البيت ، ونايمه معاهم واكله وشاربه معاهم دى مصدر كبير للفيروسات والفرو بيزود الحساسية….. أنا بقول نربي عيالنا أحسن، بلاش تقاليع، رفقا بالحيوان وماله بعيد عن أطفالنا في أماكن مخصصة، على راسي

◇ابنك اللي أقل من 4 سنين ميروحش الحضانه غير في الأيام اللي الجو فيه كويس، مش هيبقى زويل الله يرحمه يعني في كام يوم الشتا.

◇ أكل طازه كل يوم وبلاش كسل ( شوربه الخضار _ شوربه العدس_ شوربه فراخ و شوربه اللحمه ) مفيده جدا في البرد .

◇ لو بتلبسي ابنك قطعه وحده او بتلبسيه 100 قطعه زي مايقلع يلبس يعني زي قلع 4 يلبس زيهم 4 مثلا يعني.

أما الأمهات المرضعات يركزوا معانا شوية؟

◇ لما تحبي ترضعي ابنك مش تاخديه في جو برد وترضعيه لازم ترضعيه في مكان دافي.

(لان الطفل لو في مكان برد هيبقي زوره بارد من النفس واللبن بطبعه هينزل سخن يبقي سخن علي بارد نشاط للبكتريا والفيروسات .)

◇ طبعا نظافه صدرك وبالذات الحلمه قبل كل رضعة دي حاجة مفروغ منها علشان الميكروبات والفطريات .

◇ فيتامين سي وفيتامينA جامدين في الشتاء وبيزودو المناعه جدا وبالدراسه وبالخبرة كمان فيتامين D مهم ومفيد جدا وبيقلل الادوار جدا .

◇ معظم التهابات الشتاء فيروسيه مش بكتريا ، بلاش تجري وتدي مضاد حيوي عمال علي بطال، والدكتور اللي يقولك اصبري على مناعة الطفل ونديها فرصتها، تقولي عليه مش بيفهم حاجة، حضرتك كده اللي من غير ما تفهمي بتدمري صحة ابنك ومناعته.

متنساش دعوتنا الحلوة💕 وكمان اعملي شير عشان الفايدة تعم ويستفيد الغير.

كل شتاء وانتو طيبين، وربنا يحفظ جميع أولادنا🙏