فيك تقنعني وانا مستعد كون معك ضد الحزب والمقاwمة 

بقلم ناجي امهز

والله الهجمة كبيرة يعني الواحد بفوت على الانترنت او مواقع التواصل الاجتماعي وتسعين بالمائة من الفضائيات كلها ضد الحزب…
ومش بس هيك ما في رئيس دولة الا وشغلته وعملته الحزب من اكبر دولة لاصغر دولة بالعالم.
لك حتى المقالات بالصحف، بتقرأ مقال بكون مؤلف من خمسمائة كلمة بتلاقي بيناتهم اربعمائة كلمة مكررة الحزب الحزب الحزب، وما فيه غير اسم كاتب المقال ما فيه كلمة حزب، حتى المقال يلي هو عن فن الطبخ، بقلك الشف فيه اوعى تقوم بعملية التسخين كالتي قام بها الحزب.
حتى بصفحات الحوادث، اذا غرق انسان ببحر الكاريبي او بمثلث برامودا بقولوا، وقد جدت جثة الغريق الذي ارسلته مليشيا الحزب سباحة من لبنان ليقوم بعمل ارهابي بامريكا.
والله مش مزح، بالسنة يتم القاء القبض على اكثر من مليون مجرم بالعالم، بيطلع بالاعلام انهم كلهم شيعة من الحزب، لك يا عمي كل شيعة لبنان ما بيطلعوا مليون.
ولاني فهمان انكم بدكم تعلموا راي عام شيعي ضد الحزب، فانا حتى وفر عليكم الوقت اذا بتقنعوني بتكونوا قنعتوا الشيعة وعلى مسؤوليتي.
يعني حتى امشي معك انت يلي معارض الله وحزبه، وصير مع امريكا واسرائيل، ممكن تشيل من ذاكرتي المجازر والمذابح من دير ياسين وبحر البقر وكل يلي قتلتهم اسرائيل على مساحة العالم العربي، حتى اجتياح لبنان ومجزرة قانا، فيك تمحيهم من ذاكرتي.
فيك تشيل من وجع قلبي صورة الطفل محمد الدرة وهو عم يقوصوه الاسرائيلية بحضن والده، لك يا عكروت انت مجنون اذا مفكر اني رح اقبل ابني يموت بحضني قبل ما اقتل يلي بدو يقتله او موت قبله.
طيب بلا الاسرائيلية بدك ياني امشي مع الوهابية والسلفية تحت شعار العروبة واترك ايران:
يعني اي دولة عربية بدك ياني امشي معها واترك ايران، ليش في دولة عربية الشيعة فيها مش مدعوسين وتتم معاملتهم كعبيد ما قلهم اية حقوق، لك زبالين ممنوع يشتغلوه.
فيك تعطيني ضمانة وحدة ما يصير فينا نحنا الشيعة بلبنان متل ما صار مع الزيدية والمسيحيين بالعراق وسوريا وكتير محلات.
بدك ياني صير معك وطالب الحزب بتسليم سلاحه، فيك تضمنلي انه ما يطلع شيخ تكفيري سلفي، ويقول يا قوم ان الشيعة كفار فاقتلوهم واغتصبوا نسائهم وخذوا اولادهم رقيق، هودي علمتهم داعش او ما عملتهم، وامام كل الاعلام العالمي…
طيب فيك تضمنلي انه اسرائيل ما تجتاحنا بفرقة بلاي بوي اذا سلم الحزب سلاحه.
فيك…
طيب اذا ما فيك، ومش عارف ربك وين حطك، طيب شو بدك مني، لاحقني بالاعلام على الحمام، باخبارك وكذبك وحقدك ونفاقك وجهلك.
فيك تفهمني شو بدك، يعني الواحد منا عايش كل حياته بالتعتير والعذاب متل غالبية هالشعوب العربية يلي عيشتها متل الكلاب بتشبع يوم بتجوع عشرة، وكل املها انه الله يغفر قلها ويدخلها الجنة.
بدك يانا نكفر بالله ونعمل اسرائيلية ويهود لنخسر الاخرة متل ما خسرنا الدنيا،
يعني عنجد تخينة.
يا عمي انا مش مع الحزب، انا بدافع عنه لاسباب استراتيجية تتعلق بالاقليم وما افرزته العصبيات الطائفية بظل مقاييس القوة والاقليات المضطهدة، بس بشرفي صرت عم فكر انتمي لقله، حلوا عن الله تبع حزبنا وعنا، لان كل شي زاد حده نقص،
بدنا نحضر شي، بدنا نقرأ، والله بطل قلنا نفس. حتى اولادنا صرنا منستحي ندور التلفزيون قدامهم بسبب هالبرامج السياسية، وكانوا الواحد عم يحضر فيلم اباحي.