همسات المساء

كتبت بعيد انفجار مرفأ بيروت
بالعامية

بقلم: فؤاد عيسى

لعيونك بكيت الأرزات
والحزن عالنس فتح بوابو
وبالبحر وقفت الموجات
ونشفت ميتو وبين ترابو
يا بيروت ضاعت الكلمات
والفرح حزنان خزق كتابو
والهم يحكي للأسى حكايات
والدمع عالخد فاض مزرابو
اليتامى تصرخ بنهدات
عاهل بقلب الموت غابو
وحزينة تصرخ ابنها مات
وصارت تتعطر بريحة تيابو
ومسكين كان يحضن النسمات
وعن بيروت يخبر صحابو
يا بيروت رغم كل الأزمات
عليك المجد رح يكتب كتابو
بقلم فؤاد عيسى