💥(شو بجبلَك من البيت ؟؟)💥

طارق مزرعاني

بيوم من ايام الحرب اتصل فيي أحد أصدقائي وقللي أنا بحولا قدّام بيتك ، شو بدّك جبلك أغراض ،
معي محل زيادة بسيارتي،
ويمكن هالفرصة ما تصحّلك مرة تانية ،
وحاول يقنعني ، لكن انا قلتلّو لأ شكراً مابدّي شي..
وبعدين طلعت معي هالقصيدة،

وعنوانها (شو بجبلك من البيت؟):

قللي شو بدّك جِبلَك من البيت
بْسيّارتي في مطرح زيادة

عالقليلة جيب تنكة زيت
وجايي الشتي بتحتاج سجّادة

عمول متلي غْراض ما خلّيت
وجبت مونة وأكل لولادي

أحسن ما قول من القهر يا ريت
لمّا حجارو بتلحق الوادي..

… صْفَنْت نِتفي ورجعت ردّيت:
كل شي حلو من ريحة بلادي..

لكن أنا بوصّيك من هالبيت
تجبلي شويّة عز … زوّادة

طارق مزرعاني
كفررمان آذار ٢٠٢٤