البكي ختيَر

خضر حيدر

مش عادتو عالدمع يتأخَّر
شو قولكن هاك البكي ختيَر؟
قالي انطرني عالوقت
وانطرت، قدّيش انطرت
والشوق عميكبر …

ضلَّيت ع وعدو شهر
متل العميطفِّي جمر
والإيد شعلة نار
من بعد سنتين وشهر
نشفو عيونو للنهر
صارت الميّ حجار
وبعدو انقضى مِيَّة شهر
لا علم منّو لا خبر
باب الوقت سكَّر…

معذور يمكن هالبكي
معذور لولا ما حكي
عن لوعة المشوار
من خجلتو يمكن هرب
يمكن تفركش عالدرب
من مشية الختيار
وفي ناس قالولي انكسر
ضهرو من هموم العمر
ما عاد يتجبَّر
معذور لمَّا بينوجِع
قلبو متل خلص الدمع
قلبي أنا أكتر !

.