… ليش الارض بتهز؟

حسن عليّ شرارة

هَالبَشر عاثوا فَسادِ
بْهَالأرضْ
وْنِزلو بِسَطْحَا وْعِمْقَها
طَعنْ وْقَرضْ
وْظنّوا التَّعدِّي
عَ حقُوقا فَرضْ
وْقَسَّموهَا خْطُوطْ
طُولْ وْعَرضْ
وْكِلّ مِنْ عَلى خْطُوطُو
صَارِ يْحِزّ
وِبْقَلبْ قَلبا
خَنْجَرو بِيغِزّ
وْيِدمِلِ البَحر
وْمِن شَواطِيها يْجزّ
يْفِجِّر نُفايَاتو
وْبِبَطنا يْلِزّ
وِبْتِعجَبو ليَش الأرضْ
بِتْهِزّ؟!
عَم تِرتِكي عَالشّير
تَا تاخذْ رَاحِتا
وِتْنَام عَ تختِ الأثير
مهدِ الغُيُومِ مْخَدِّتا
شو العملْ والتّدبير
انْ طالتْ هَزّتا ؟!