فايقة من الصبح مش حاملني راسي..

بقلم: ريف سليمان

حزينة انا و عم شوف اقرب الناس حواليي عم بهاجروا!
قديش حزين هل بلد! بيروت المطفية مشلولة !قديش مش محظوظين نحنا كأنه حدا داعي علينا !فجأة كلنا خرسنا و تعبنا و استسلمنا😥 باقي هل قلم يكتب لعل و عسى حدا يفهم شو في جواتنا متل اللي عم يكتب مكتوب و يحطو بقنينة قزاز و يكبا بالبحر بركي بيوم حدا يلاقيها و يعرف …
والله كتير حلو لبنان بجبالو و وديانو و بحرو و طقسو و انهارو وريحة الضيعة و المونة و تلاله و تعدد اديانه …وقديش طيب اكلو و ضيافة شعبو و خدمة مطاعمو ونظافة اوتيليتو و مواقعهن و بيوتو القرميد و آثارو و انفتاحه عل آخر و حرية التعبير فيه…
موقعنا الجغرافي لعنتنا… و تعدد الطوائف اللي المفروض غنى و انفتاح و تعايش خلّوه كمان لعنتنا!
قديش العلم عنا بالمدارس و الجامعات قوي… احسن المستويات و الأساتذة الخريجين من كل البلاد …
و عنا تعدد لغات و لغتنا من أهم لغات العالم…
حضارتنا و تاريخنا بيشهدو علينا و قديش قواية و مر علينا حروب كتير و صمدنا و كملنا 😪
قديش حلوة فاريا و بشري و جرجوع و جباع و جبيل و كفريا و فقرا و برمانا و…..
قديش حلوين نحنا كشعب بخلقتنا و جمالنا و كرمنا…
قديش كنا أذكياء لو مش متعصبين 😪 يا ريت ما منكرر نفسنا و منتعلم من أخطائنا و منعلم ولادنا الانتماء…
اليوم الصبح حسيت كيف اللي حواليي بالشغل و جيراني و اهلي و اصحابي و ولاد اصحابي تركو و فلو ع بلاد تانية و اكتريتهم عل إمارات و قطر و اربيل ومصر …
صراحة نيالهم هل بلاد العربية اخدو خيرة شبابنا مبروك عليهم و هارد لاك النا… ما بعرف شو باقيلنا هون بس بعرف قديش رح يساعدو بازدهار البلاد العربية لأنه نحنا قيمة مضافة صراحة من دون غرور احسن أطباء و مهندسين و مفكرين و دكاترة و اداريين …بارمين بلاد العالم و شايفين و مخالطين و منلتزم برا بقوانين البلاد و يا ريت عنا هيك 😪
بتمنى التوفيق لكل اللي صحلو فرصة برا و يا ريت ما يفكرو يضلو برا…
الانتماء للوطن شي ما نزرع فينا لان عطول كنا بحالة حرب و وجع و هروب و طائفية….
بس يا ريت تتذكرو اهلكن هون و امهاتكن اللي راح عمرن ليعملو منكن بني آدمين…اهلكن اللي ناطرين ع احر من الجمر بدموع و حرقة قلب بدن ياكن تفلو بس عم ياكلن الوجع و الحنين و العمر و الوقت 😥 حرام كل مين خلف بلبنان ليصير مصيرو الغربة و الفراق …
ما بعرف اذا السياسيين عنا حاسين بهل موضوع و اذا ايه شو عملو بالشباب ؟ لا عندن خطط و لا شي و شو رح يعملو!
يا ريت اللي نازلين عل انتخابات يخبرونا ؟
الجيل اللي كان عنا امل فيه فلّ يفتش ع مستقبله قبل ما تاكله الغبرة ويصير ذكرى بسبب رصاص طايش او حادث سيارة او يروح فرق عملة او سكتة قلبية و اللي بقي هون عم يناضل ما تركولو حلم غير يفكر كيف يأمن أكله وشربه ودواه لآخر الشهر😥
ما حدا يقول في امل و لا لبنان رح يرجع و اذا رجع منعيد نفسنا و ما ح يخلونا نكبر كل مرة بدنا نبلش من جديد لو جربنا… خلصت حلول الأرض و الشعب اللي بفكر و عنده دماغ مات طموحه انكسر قدام حاجة ابنه… تلات رباعه فل.
عشتم و مات الضمير