لازم نعمل كل شي.. حتى ما نخسر اللي بنحبهن بالكورونا…

كتير مؤلم رحيل الدكتور لؤي اسماعيل بعد إصابتو بفيروس كورونا

المشهد كتير مؤلم.. وداع الدكتور اللي حلم 32 سنة بالأبيض.. ودّعوه رفقاتو الدكاترة بالمستشفى عن بعيد.. كلهن بالأبيض وهوي  بالكفن وأسود مش أبيض..

كتير مؤلم رحيل الدكتور لؤي هوي وعم يقوم بالواجب.. ما بعرف شو صار.. ولا التفاصيل.. بعرف خسرناه.. خسارة فيها كتير من الحسرة..

الكورونا خطف أول طبيب بلبنان.. وخطف أول رضيعة من كم يوم.. والإصابات كل يوم عم تزيد.. 

ما بعرف شو لازم نقول.. شو لازم نعمل.. من كم يوم قلت ورح إرجع قول.. مش لازم نخسر حدا.. لا طبيب ولا ممرض ولا مسعف.. ولا ختيار ولا شاب ولا طفل.. يعني كبار وزغار، صار لازم نعيد حساباتنا بالحماية وبكل إجراءات الوقاية.. حتى ما نعيش مآسي كورونا.. وإذا كانت الكمامة حل لازم نلبسها.. وإذا كان التباعد حل.. لازم نبعد.. وإذا كان التعقيم حل لازم نعقّم الدني كلها.. حتى ما نخسر اللي بنحبهن

ليال رحيل – الخيام