لأهل الجنوب الصامدين… ألف تحية وسلام من أرض القاع لإلكن.

كتبت: رولى ابراهيم التوم

يمكن اليوم نحنا عم نحتفل بتخرّج ولادنا، وعم نفرح فيهن، بس فرحتنا بتبقى ناقصة، لأنّا منعرف إنو في ولاد بالجنوب محرومين يعيشوا هاللحظة، يلبسوا توب التخرّج، ويفرحوا بين أهلن وأحبابن… لأنّ الحرب والوجع سرقوا منن هالفرحة.

لإلكن منقلّكن: وجعكن وجعنا، وقلبنا معكن. لأنّ وقت بيتوجّع الجنوب، لبنان كلّو بيتوجّع.

ومن هون، من القاع، منرفع صلاتنا حتى يرجع السلام يعمّ كل لبنان، وترجع الضحكة تعلّي بكل مدرسة، وبكل بيت، وبكل ضيعة.

وإن شاء الله، قريب كتير، منلتقي كلّنا على فرحة وحدة… بلبنان متل ما منحلم فيه: لبنان الحياة، ولبنان الفرح، ولبنان اللي ما بيعلى فيه غير صوت الأولاد، وجرس المدارس.

لأهل الجنوب…
إلكن منّا كل التحية، وكل المحبة، وكل الوفى