شو مهضوم هالختيار

بقلم علي خيرالله شريف

يلي بيشوف الختيار توماس باراك عم يحكي عا باب القصر الجمهوري بيقول يا سبحان الله أميركا شو صايرة ناعمة، بسمتها رطلين، ولطافتها يخزي العين، وتوزيع لياقات عالميلين.
يلي شافو عا باب القصر كان رح ينسى مكر عاموس هوكشتاين وسموم ليزا جونسون وخبث مورغان أورتاغوس، وحقد دوروثي شيا. وكان رح ينسى شو عمل جيفري فيلتمان وكونداليزا رايس، وكل الخنازير البرية ورعيان البقر وزعران الكوبوي وقراصنة الأرض والسماء والأميال البحرية.

عا لحظة زغيرة كنا حا ننسى إنو هادا المبعوث هو مبعوث نفس الرئيس الكذاب اللي غدر بالمفاوضات، ونكث بالاتفاقات، وحلب بعران الخليج بالتريليونات، ونصب مصيدات المساعدات لأهل غزة بالعشرات حتى يقتلهم بالمئات.

مهما تمسكن توماس باراك، ما بتنتسى جرائم بلادو أميركا بكل مكان، باليمن والعراق وأفغانستان والبوسنة والهرسك والبورما وليبيا والسودان وسوريا مرات ومرات، وغزة وفلسطين آلاف المرات. وبلبنان مش معقول ننسى نيوجرسي ومجازر قانا وحصارنا وتهديدنا عالطالع والنازل…

لذلك يا جماعة تقلوا حالكم وكبروا عقلكم وفكروا منيح قبل ما تطلعوا عالشاشات وتفقعوا التصريحات والتحليلات، لأنو أميركا يا سندي ما عندها إلكم إلا السم والسكين يا مساكين.
يعني نصيحتي ما تفكروا هالختيار مهضوم، لأنو حامل لكم بقلبو كل أحقاد الكون وأكتر القنابل ثقلاً وقتلاً وإبادةً. يعني بالمختصر المفيد، إذا غلطنا وسلمناه رقبتنا، من هلق قولوا الله يرحمنا.

الثلاثاء ٨ تموز ٢٠٢٥