حقي اورث

بموسم قطاف الجوز، اجا رجل من الضيعة مع ابنه لعند زوجي يستفسروا على حق كيلو الجوز كون زوجي بيتاجر بالفواكه وقال عنده شي ١٠٠٠ كغ وعند أولاده الاربعة كل واحد شي ٤٠٠ كغ وبدو يبيعنا ياهم… رد عليه زوجي: الكيلو بين ال ٣ وال ٦ دولار حسب النوعية والحجم، بيرد الرجل: خايف ما كون ظلمت يلي بعتهم جوز من شان هيك عم اسأل، وقال انه باعهم ب ٥ دولار… قاله زوجي كتير مليح لا ظالم ولا مظلوم… هون رد الرجل: عكل حال ما حدا غريب بعت ٥ كغ لبنتي.

زوجي انصدم وقاله: بعتهم لبنتك؟ عطيت لأولادك الذكور ارض مشجرة جوز وعم تبيع الجوز لبنتك…

تلبّك الرجل وقاله: لا لا مش لبنتي، بعتهم لقرايب زوج بنتي… بنتي رح اعطيها جوز لب…

غيّر زوجي الحديث ليخفف عنه الإحراج، رجع الرجل كل شوي يبرر… قاله زوجي: خلص يا أخي والله صدقتك…

مرق اسبوعين، واجت البنت مع زوجها لعنا واشترت جوز ولوز وقالت والله هالجوزات عندكم احسن من ال ٥ كغ يلي اشتريتهم من الضيعة وارخص…. ما حبينا نسألها من وين حتى ما نحرجها بس تأكدنا انه من عند أبوها…

#حقي_إورث