حقي_إورث

توفى ابي وكنا صغار، نحن ٤ بنات وصبي، انا كبيرة اخوتي والصبي الصغير، كان عمري ١٣ سنة، كنا قاعدين ببيت اجار… امي ما خلت حدا من يلي بياخدوا بنات تشتغل بالسهول الا وبعتتني معه. نطلع بالبيك آب متل كياس البطاطا فوق بعض، ياما مرات توقع البنات لما يقلع الشوفير، واكتر من مرة مات بنات. بعد الضهر اجي عالعجين والخبز والغسيل ونشر الحطب. كل آخر شهر يجي الشاويش يحاسب امي قدام عيوني. استحلي تشيل منهم حق قطعة تياب او بوظة لهالجسم التعبان. قول ماشي الحال بدنا نتعاون عالحياة نحن أيتام…

اخواتي البنات زوجتهم عال ١٤ سنة وحدة ورا التانية لتخلص منهم وانا ما كانت تزوجني لحتى ضل اشتغل. خيي حطته بمدرسة خاصة، وكانت تجيبله احلى تياب.

صار عمري ٢٦ سنة وبعدني عنفس الحال، البس من ورا الاجاويد وخيي يلبس احلى لبس. واشترت امي بيت ومعه شقفة ارض صغيرة وسجلتهم باسمها وكانت تقول انا ما رح سجل لحدا، بعدين بتورتوهم كلكم. صار خيي استاذ وتزوج وسكن بالبيت وانا صرت حمل تقيل عليه وعلى زوجته. هلق صارت امي بتقبل اتزوج، ضغطت عليي لتزوجت أرمل اكبر مني ب١٨ سنة وعنده ست ولاد…

بعد سنة وحدة من زواج خيي سجلتله البيت والارض باسمه، وصارت كل يوم والتاني تعلق هي وزوجته يلي اشتكت من وجود امي معها. بتجي امي كل يوم لعندي بتشكيلي وبتنقلي مشاكلها كأنني انا ناقصني…

ذكرتها بيلي عملته فيي، الاستغلال والإهمال والحرمان، قالتلي نسيتِ لما اخدتك عند الدكتور لما كانت ضاربتك الشمس؟ هون طار عقلي، انه انا جيت من السهل مريضة كتير، عم تربحني جميلة…

حرقتلي حياتي ولا تهنت ولا خلتني اتهنى بتعبي وعمري. بشفق عليها هلق، بس شو طالع بإيدي… خيي لازم يعملها بيت مستقل.

حقي_إورث