قال لشبيبة الأبرشية دوركم كبير ببناء الذات والكنيسة والوطن

ابراهيم: “لانتخاب رئيس جديد للجمهورية لإنقاذ ما تبقى من الوطن”

اقام مكتب الشبيبة في ابرشية الفرزل وزحلة والبقاع للروم الملكيين الكاثوليك ،لقاء” شبابيًا لاكثر من 400 شاب وصبية برفقة الكهنة من رعايا الأبرشية في البقاعين الغربي والأوسط مع المطران ابراهيم ابراهيم، في مطرانية سيدة النجاة في مدينة زحلة، تحت عنوان ” فليكن لي حسب قولك”، بمشاركة اعضاء من الشبيبة الطالبة المسيحية، شبيبة العمل المخلصي والرهبان المخلصيين والشويريين.

بداية وصول الفرق الشبابية الى المطرانية والتسجيل للحضور ، ثم اقيمت صلاة الصباح في قاعة المطران اندريه حداد بحضور ومشاركة المطران ابراهيم، ومرشد الشبيبة البطريركية الأب ساسين غريغوار وعدد كبير من الكهنة،ثم تحدث مرشد الشبيبة في الأبرشية الأب اومير عبيدي ، فالقى كلمة شكر فيها بإسم الشبيبة المطران ابراهيم على الإستقبال وعلى احتضانه ودعمه الدائم للشبيبة،

ثم توزعت الشبيبة برفقة الكهنة على فرق ناقشت مواضيع شبابية متعددة

ثم ترأس المطران ابراهيم قداساً احتفالياً بمشاركة لفيف الكهنة، وبحضور مدير عام وزارة الزراعة المهندس لويس لحود، رئيس جمعية تجار زحلة زياد سعادة، وفرق الشبيبة ،بعد الإنجيل المقدس، القى ابراهيم كلمة اكد فيها: “الله يبارك فيكن، وإسم الله عليكن. يعني عن جد بتكبرو القلب. حاسس حالي ببحر من القوة والحيوي، وأنا دعيتكن لمطرانيتكن وإنتو بكرم لبيتو الدعوة. حبيت بهاللقاء قلكن إنو من دونكن نحنا فقرا. وحبيت كمان قلكن إنو نحنا وإنتو من دون الله فقرا. الغنى الحقيقي إنو متل بنت بلادنا الطاهرة نقول لألله من دون أي تردد ” ليكن لي بحسب قولك”. هيدا عنوان اللقاء. لقاءنا معكم “.

وتابع ابراهيم:” أحبائي الشباب، اذا كنتو مليانين من الله ما بيعود شي يغلبكن. انتو ببلد غرقان بالمشاكل. مش معناتها إنو انتو لازم تكونو غرقانين كمان بالمشاكل. ليش بدنا نستسلم للغرق؟ ليش ما من نكون المنقذين؟ ،إنتو خلاص لبنان، انتو قوتو وقوة بناء الحاضر والمستقبل. التصدي للتحديات والأخطار هيي مهمة الشباب المليان من العلم والفهم والايمان والعقيدة الصحيحة والرؤيا الصائبة. الشباب ما بيقبل الكذب. انتو جيل الصدق والحقيقة. وكلامكن مقرون بالعمل. ببلادنا بياعين الحكي كتار لكن انتو بتجسدو الآية اللي بتقول إنو الإيمان من دون أعمال ميت ،فالايمان من دون تطبيق بيصير مجرد حبر على ورق”.

واضاف ابراهيم:”إنتو الشباب عندكن القدرة على التغيير، سواء بنفوسكن أو بمحيطكن. انتو عندكن حرية وجرأة وإبداع وطاقة لإحداث التغيير. الشباب هوي رؤية وأهداف وخطط لتنفيذ التغيير. الشباب هوي شغف وإصرار وصبر لاستكمال التغيير. لكن هالتغيير ما بيعني أبدا إنو غيّر مطرحي، غيّر ضيعتي وأرضي ووطني بالهجرة لوطن تاني. الهجرة يا شباب ويا صبايا مش هيي التغيير. الهجرة مش مغامرة سهلة، الهجرة هيي نقلة هدامة للهوية وللتراث وللقيم اللي توارثناها من جيل لجيل كأساس صلب للوجود والثبات بأرضنا وبكنيستنا وبالوطن. التغيير الحقيقي المطلوب هوي رفض أي تغيير بينفرض علينا من دول وقوى ومجتمعات ومال وإعلام مأجور هدفو ييأسنا ويخسرنا الايمان ببلادنا.”

واردف ابراهيم: “نحنا ما خلقنا صدفة بهالأرض، ما خلقنا صدفة بزحلة، بالفرزل، بتربل، بأبلح، برياق وحوش حالا، ببر الياس وبقب الياس وبجديتا وبمشغرة وبعيتنيت وباب مارع وصغبين وخربة قنافار وعانا والمنصورة وكفريا وجب جنين وتل دنوب والدكوة وكفرزبد وعين كفرزبد وقاع الريم وجلالا وتعنايل وتعلبايا ونيحا وعميق وشتورة والمريجات وكسارة والمعلقة وحوش الامراء وحوش الزراعنة ووادي العرايش والتويتي ودير الغزال … مش صدفة أبدا نحنا خلقنا فيهن. بهل حياة الله عندو مشروع لكل واحد فيكن صدفة خلقنا بلبنان ومش صدفة أبدا خلقنا مسيحيين وروم ملكيين كاتوليك ملكنا هوي الله، الملك السماوي.”

وختم ابراهيم:”يا صبايا ويا شباب نحنا صحيح موجودين بعالم مضطرب ومفكك، لكن نحنا ما بيجوز نكون متلو مضطربين أو مفككين أو مزعزعين. العالم ما بيفرض حالو علينا، نحنا منغير العالم ومنفرض حالنا عليه. نحنا قوايا. عملو معروف عيدو ورايي بصوت قوي: نحنا قوايا… نحنا قوايا… نحنا ولاد الله… نحنا ولاد العدرا… نحنا ولاد البقاع… نحنا ولاد أبونا بشارة أبو مراد… نحنا ولاد الايمان… نحنا ولاد لبنان. وبحب قلكن إنو دوركن كبير كتير، ومهم كتير، ببناء ذاتكن وببناء كنيستكن ووطنكن والإنسانية. عندكن كتير مواهب تستثمروها لصالحكن وصالح الآخرين. عندكن رسالة وشهادة وإنجيل فيهن بتضوو عكل الدني. نوركن أقوى من أي عتمة. عندكن حب ورحمة وعطف فيهن بترضو الله والضمير.إنتو شباب فوق المظاهر والمصالح والمجاملات الفارغة. إنتو بتخدمو بالمحبة والإخلاص مش بروتينية أو كسل أو ملل، لكن بحماسة وفرح ولهفة بعالم محتاج لنوركن، يعني لنور المسيح.”

وفي الختام طرحت اجوبة وتوصيات الفرق التي ناقشت المواضيع المتعددة

بعد استراحة الغداء، عرض لفيلم وثائقي عن نشاطات الشبيبة في الرعايا والأبرشية ، وعقد لقاء حواري مع نقيب اطباء لبنان في بيروت البروفسور يوسف بخاش الذي اطلع الشبيبة على تحضيرات كنيسة الروم الملكيين الكاثوليك للإحتفال “بسنة اليوبيل” بمناسبة ذكرى مرور ثلاثمئة سنة على اعادة الوحدة مع الكرسي الرسولي الروماني، ودور الشباب في ابرشية الفرزل وزحلة والبقاع في احياء هذا اليوبيل.

وفي النهاية قدمت فقرة فنية حيث رقص الشباب على انغام الموسيقى وحلقات الدبكة،والتقطت الصور التذكارية مع المطران ابراهيم ووزعت الهدايا تذكارية لكل المشاركات

انتخاب رئيس جديد للجمهورية

من جهة اخرى قال المطران ابراهيم :” ندعو الى انتخاب رئيس جديد للجمهورية من دون أي تأخير”

واضاف ابراهيم في تصريح ادلى به:”ها نحن اليوم على عتبة السنة من الفراغ الرئاسي، والبلد يتخبط بشتى انواع الأزمات التي طالت كافة شرائحه، وما زلنا نرى السياسيين في لبنان يتقاذفون المسؤوليات دون المبادرة الى لقاء جامع يؤسس لبناء الدولة والمؤسسات. ما زالوا ينتظرون الزيارات لموفدين من الخارج، وربما الإملاءات الخارجية دون المبادرة الذاتية الى التلاقي والحوار لتغليب مصلحة الوطن والمواطن على المصلحة الشخصية. ما زال السياسيون يصمون آذانهم عن صراخ ووجع المواطنين الذين يعانون من غلاء الأقساط المدرسية في بداية عام دراسي مهدد، من ارتفاع اسعار الدواء وانقطاع ادوية الأمراض المستعصية، من غلاء اسعار المحروقات ونحن على ابواب فصل الشتاء، من توقف العمل في ادارات الدولة التي تشكل المصدر الأساسي للدخل وبالتالي تأخير المعاملات، من توقف عمل القضاء الذي يعتبر اساساً في قيام الدول، من رواتب متدنية لا تتناسب مع ارتفاع تكاليف الحياة وغيرها من الأزمات، ولم نرَ مسؤولاً واحداً تحرك في محاولة للمعالجة. “

وختم ابراهيم:”اليوم نحن امام فرصة حقيقية للتلاقي والحوار وفق احكام الدستور اللبناني، لمحاولة ايجاد الحلول لكل المشاكل التي اوردناها آنفاً وفي طليعتها انتخاب رئيس جديد للجمهورية وتشكيل حكومة جديدة، واعادة الحياة الى مؤسسات الدولة وفق معايير الشفافية والعدالة ،وحان الوقت لوضع كل الخلافات جانباً والتفكير جدّياً في انقاذ ما تبقى من الوطن. انها مسؤولية وطنية يجب على كل مسؤول تحملها”.