بعد الأم أحفر وطم

كلنا أول مانفوت عالبيت بنسأل وينا أمي؟؟ حتى لو مابدنا منها شي لأن البيت بلاها مافي روح ، وقد ماتكون موجوعة وتعبانة بتشتغل بالبيت وبترتبه وبتعمل أكل ووقت بتحط الأكل بتروح تصير تجلي وإذا قعدت لتاكل بتقعد ع طرف لتوسّع محل للكل وأنو هي ما كتير جوعانة وأكلت كم لقمة هي وعم تطبخ وفيها توصل لكل الصحون ، إنتوا كلو وشبعوا شو بدكن فييّ ، وبتصب للكل ومابترضى حدا يصبلها ودايما بتحط شوية أكل بربع الرغيف ومابتاكل من الخبز الطري ومابتقسم رغيف كامل وبتاكل من بقايا الخبز بحجة أنو بتحب الخبز البايت وبتتذكر أبنها الغايب وبتقول : علواه لو أنو معنا بيحب هالأكلة كتير ، وبتقول لكنتها أتركي هالولاد ياكلوا على رياحتهم خليهن يشرشروا هلق منمسح بس يخلصوا أكل ، وإذا أحفادها ما أكلوا بتحط الحق ع أبنها وبتقلو : الحق عليكن قلتلك لاتخليهن يشتروا من الدكان قبل الأكل ..
رحم الله من فارقنا من الأمهات
وحفظ الباقون بخير وصحة وعافية…

ورحمك الله ياوالدتي يا حاجة ام طلال حمود :فقد كنت ِ كذلك بكل تأكيد لا بل اكثر واكثر واروع من ذلك كله وكانت عندك كل هذه القيم الطيبة والمثالية.

الدعاء والصلوات والفاتحة لروحك الطاهرة يا زاهية يا طاهرة يا طيبة القلب؟!
كم اشتقت الى كل تلك الأيام؟!