عيديّة

الشاعرة رانية مرعي

مين قال عالعيديّة كبرت
وع عيون تغمرني بحنيّة

باقية انا بهالعمر طفلة ورد
عم قطف الضحكات بإيديي

بركض بصبح العيد ع حضن النور
اسرق دفا حكايات منسيّة

ما بدي أنا تياب جداد
ولا أحمل لعبتي وأنطر هديّة

بدي يا ربي بأرضي ضل
ونكبر انا ورفاقي سويي

ومن عيون بنتي يطل الربيع يهلّ
ونتقاسم الدنيي أنا وهيي

وعلّي بجوانح نسر عالغيمات
ويحرسوني عيون خيي وخيي

وبدي بهالعمر كون الحب
بدعا أمي و عزّك يا بيي