الحبّ بيتغلب على الخوف

✍بقلم الشاعرة سينتيا سماحة

ترجمة الحب بتتغلب على الخوف  بالحياة المليانة بالأكاذيب وعدم الأستقرار.
الحب هو عبارة عن مشاعر وتضحية ومغامرات عاطفية لكل  شب أو صبية بغامروا بسبيل رسالة  معينة، بس بالوقت ذاته بيدخل الخوف بطريقته غير المنتظرة وبيربك الإنسان من حيث  المضمون والإحساس.
الحياة لعبة بتعطي كل إنسان دور معينّ بقوم بتمثيله ان كان أب،أم،أخت،أخ،طفل أو مسنّ.
كل واحد له وجوده وحاضره وبالآخر بتنتهي  التمثلية ويكون أدّى دوره يا بإمتياز أو بفشل كامل.
الحياة حلوة بمعناها ونحنا منجمّلى بأدائنا وحضورنا وحبنا النابع من صميمنا.
أوقات حبّك لشي معيّن بيربكك بخليك تحسّ بوجع وخوف وببلش جسمك يرجف وتحس بإنهيار وأفكارك تاخدك وتجيبك  بكل الإتجاهات.
إذا منرجع  لذاتنا  منشوف ان الحب  أجمل كلمة منقولا لأن الله هو المحبة وعطانا هيدي  الكلمة تنعيشها بكل ألوانها.
الحب هو دايماً المنتصر على الخوف لأنه قويٍ، وقوته هو الثبات بجذور الإحساس والمشاعر والإحترام.
البعض بفرطّ فيه وما بيعطي حقه وهون بتكون الأنانية عايشة جوّاته ومسكرة على قلبه ومنلاقي تصرفاته مختلفة وشريرة وغير واضحة ومعروفة.
الحب إستمرارية بالزواج ليبني مش بس على أساس  إنجاب أطفال ونعبّي البيت ولاد ونقول  نحنا تجوزنا  و فتحنا بيوت…. لأ، حب الأسرة هو مبني  على التضحية والمثابرة ، والثقة والقتال…وفهم الغير ونعطي قد ما فينا من حبنا لإنجاح هيدي  العلاقة، هون الحب بكون انتصر على الخوف.
الحب بينتصر بوقت انتَ بتكون  عايش  بسلام وبيدخل  شخص بجرب  يقلبلك حياتك  من الخير  للشر أو بيستعمل أسلوب سيء معك وانت تكون محضر حالك للمواجهة  وتنتصر عليه بتهذيبك  وتربايتك المحترمة وكلامك الموزون.
دايما منشوف  الأذى والكره والبغض  والأنانية،موجودة  بكل إنسان فينا بس منقدر نشتغل على حالنا ونحوّلن لحب صادق عفوي  شفاف غير ملوث بألوان ونكهات بلا طعمة.
كرة الأرضية بتحتوي على ٧ بليون نسمة من جميع أنواع البشر وكيف تتكون حاضنة كل واحد بآراء  وتفكير ولون وقلب معينّ!!!!
لهيدا السبب شفت إنو انسب شي إنو نرجع لذاتنا وداخلنا ونقول الحياة قصيرة وما حدا راح وأخد معو شي غير أعمالو وأفعالو
في مزحة حبّيت ضيفا على أسطري كانت تيتا الله يرحما تقول:”يا بقولوا الناس وقت عزاك الله يرحمك أو الله لا يردك بضحكي”😊
والايمان هو أصدق حب لبيتغلب على الخوف لأننا منآمن بالله وابنه الوحيد وانو في قيامة وحياة تانية مليانة بحب أقوى من حبنا على الأرض.
إذا  منفكر ومنرجع للصلاة من كون انقذنا حالنا من الخوف والوجع.
بالآخر ، قلمي عمبيكتب بحب، وأسطري نابعة من حبي الكن،ولا مرة خليت الخوف يسيطر على كلماتي وأقوالي وآرائي.
الحب إلكن جميعا ودائمآ منتصرين بحياتنا وهون الحب  بكون تغلب على الخوف.