بزمن الكورونا… كلّو كوم.. وهجرة الأطبا والممرضين كوم

بقلم: ليلى رحيّل

كتار الناس اللي عم نسمع عنهم. من كل الأعمار والقطاعات.. بدهن يهاجروا.. بدهن يعيشوا برات لبنان.. الخبر كتير بيزعّل.. عم يفضى البلد من الطاقات اللي فيه… بس بصراحة.. يمكن تزعل.. يمكن تعتب.. يمكن ما تفرق معك.. ويمكن تفرح إن كان لرجل أعمال.. لتاجر.. لإعلامي.. لفنان.. لصاحب مؤسسة.. لطالب.. لجامعي.. وكتار غيرهن.. لاقوا فرصة عمل أحلى برات البلد.. خليهن يستفيدوا منها… فينا نضل نتواصل معهن.. فينا ننساهن.. فينا نتابع أخبارهن.. الأون لاين شغال..
بس اللي ما في مجال للتسليم فيه.. إنو الأطباء والممرضين يدقوا ناقوس الخطر ويحضروا ملفاتهم ويقرروا يتركوا البلد لمحل تاني بيقدّر شغلهن وجهدهن وخبرتهن وتطورهن… مش بلد عم ينهي خدمات قسم منهن.. وعم يحد من قدراتهن. ومش عم يدفع لقسم تاني معاشاتهن.. بلد عاجز عن تأمين المواد الأولية حتى، للمستشفيات وغرف العمليات.. بلد عم ينقطع فيه أوكسجين الحياة..
إنو أنجح قطاع هلق عنا بلبنان بنتركو يروح.. ما في مجال للافتراض هون.. ولا يمكن العلاج والشفاء عبر زووم وسكايب وكل تقنيات العالم..
نقيب الأطبا.. ونقابة الممرضات طالعة صرختهن.. لازم الكل يسمع.. لازم الكل ينقذ.. لازم الكل يحمي عالقليلة صحة الناس.. ببلد لا صحة فيه لأي شي.