يا سيد أنا المواطن ناجي أمهز بدي خبرك شو عم بصير ويلي بده يصير يصير

السلام عليكم ورحمة الله وبركاته، يا إنسان من الجنة عم تعيش بيناتنا على الأرض.

سماحتك يلي عم اكتبه هلق، لو سألوني ليش ما بتحكيه للسيد بحال شفته، رح قول لأن بحال شفت السيد مش رح اعرف احكي ولا كلمة بحضوره من شدة المحبة والهيبة، وصدقا يا سيد أنا عشت هيدي اللحظة وما بنساها قبل 11 سنة لما قلي الدكتور إبراهيم الموسوي بتحب تشوف السيد، قلت له يا دكتور بموت بالسكتة من محبتي للسيد، وكتبت يومها مقال محتواه إنه يلي مثلنا ما بحقله ياخد ولو ثوان ومن وقت سماحتكم.

سماحتك، أنا عم اكتبلك، لان بعرف اديش قلبك على هالناس وبتحب الناس وبتعتل هم الناس، وقدمت كل شيء بتملكه لكل الناس ما فرقت بينتاهم.

يا سيد امبارح انتحر مواطن لأن ما معه مصاري حتى يدخل اولاده على المدرسة، وقبلها انتحر مواطن ما قدر اشترى لابنته منقوشة زعتر، وقبل كمْ يوم وقع سطح المدرسة على بنت فقيرة وماتت تحت الركام.

والمشكلة يا سيد بس الاب او الام او حدا بالعائلة ينتحر، يعني العائلة كلها رح تعاني نفسيا لوقت جدا طويل، وهيدا الامر بكل دول العالم مؤشر خطير للغاية، وهو دليل انتهاء بلد، ونهاية شعب.

يا سيد الواحد عم ينتحر كرمال مش قادر يدخل أولاده المدرسة أو ما معه يطعميهم، يعني يا سيد كل يلي حوله أما بطل فيهم إنسانية، أو الكل ما قدرتهم يساعدو بعضهم، يعني المجتمع تفكك وانهار.

والمشكلة يا سيد، انه ولا سياسي اهتزت شعرة براسه، وكان هالمواطن يلي انتحر او مات بالبحر او تحت سقف مدرسة بسبب فسادهم واهمالهم وعدم اهتمامهم، ما قله اي قيمة، وهيدا شي طبيعي لان غالبية هودي السياسيين، فاسدين، مجرمين، قتاليين قتلى، ويلي ما قتل منهم بالحرب سرق الناس بالسلم.

يا سيد قتلوا الناس الفقراء والمعترين،

يا سيد سرقوا الناس وأحلامها.

يا سيد الناس عم تبيع أملاكها وتاخد أولادها وتروح تموت بالبحر.

يا سيد الفرق بينك وبين بقية السياسيين كثير كبير، لأن غالبية السياسيين، لا فرقانه معهم الله ولا عبيد الله، ومثل ما سماحتك متيقن أنه في جنة ونار وكرمال هيك بتخاف ربك بالسر مثل ما بالعلن، هودي متيقنين أنه لا في لا جنة ولا نار، كرمال هيك لا بخافو من ربنا لا بالسر ولا بالعلن، ولأن في حدا داعمهم ما بخافو من هالناس يلي كل يوم عم تموت ألف موتة.

يا سيد هلق بدهم يرفعوا الضرائب على الناس، حضرتك وعدت يا سيد زيادة ضرائب ما في، يا سيد لو بصير الدولار بمليار ليرة، لازم ما تزداد الضرائب، خيلهم يردو يلي سرقوهم.

وأوعى تصدق أنه قلبهم على البلد، هودي يا سيد لو قلبهم على البلد والناس، ما بيرفعو الضرائب، هودي بجيبو الفيول الإيراني تتخف العتمة على الناس والتكاليف، بجيبو أدوية ومساعدات، بيدفعو من جيبتهم، الأكثرية يلي بالسلطة معهم أموال بتعيش بلد.

هودي يا سيد بدهم يقومو الناس عليكم، لأن بس ترتفع الضرائب رح ينقال الحزب هو يلي رفع الضرائب، ونوابه ووزرائه موافقين.

يا سيد الناس قلوبها مليانة، والناس ما بتخاف منكم لأن أنتم بتخافو الله ويلي بخاف الله ما بينخاف منه، كرمال هيك الناس لا شعوريا رح تفقع بوجهكم، اذا ارتفعت الضرائب.

يا سيد، لبنوك إذا بدها  من مؤسسة ألف ليرة كانت تجيء الدولة وتسكر المؤسسة وتشرد الموظفين تياخد البنك ألف ليرة تبعته، وهيك آلاف المؤسسات تسكرت ، وصار في بطالة ما قلها حدود، ويلي فل من مؤسسة سكرها البنك بطل قادر يدفع كمبيالة بيته أو سيارته يلي راهنهم للبنك، وهيك البنوك أخذت كل شي، سكرت المؤسسات وصادرت الأملاك وانهار لبنان، وحتى الودائع راحت والتعويضات، يعني رح نسمع كتير عن ختيارية عمب موتو على الطرقات لان يلي كان تعويضه بساعده بكبرته صار بلا قيمة، والدولة ما عم تقدم شي، لا طبابة ولا ضمان شيخوخة، ولا حتى مساعدات.

يا سيد، خلي الدولة تطلب من البنوك ترجع المصاري يلي مش معروف وين راحت، مش ترفع الضرائب على شعب عمينتحر من الفقر والتعتير،  خلي  السياسيين يلي هربوا مصرياتهم يدفعوا مع العلم ان غالبية السياسيين مصرياتهم سارقينهم من الشعب.

يا سيد قضيت كل عمرك تقاتل الظلم والظالمين وتدافع عن المظلومين، والله العظيم يا سيد نحن أكتر شعب مظلوم.

يا سيد احترق قلبي على الشخص يلي انتحر،

يا سيد ما قلنا غير الله وغيرك، وما تصدق يلي بتسمعه على الإعلام، صدقا يا سيد 90 بالمية من الشعب اللبناني بحبك.

يا سيد اخصامك وأعدائك عم يحكو الدغري لما بقولو الحزب حاكم لبنان، وأنا بقلك عنجد الحزب حاكم لبنان، لأن لبنان وشعبه محكومين بمحبتك يا سيد، كرمال هيك يا سيد كل الدول يلي هي ضد الحزب بتشتغل -ليل نهار-  تتقنع الناس أنه الحزب هو حامي هيدي الطبقة الفاسد، وبس ترتفع الضرائب، رح تطلع موجة اعلامية وسياسيين يقولو أنه الحزب هو يلي موافق على رفع الضرائب.

سيد، لو هيدي الطبقة السياسية قالت اللبن أبيض تأكد أنهم عم يكذبو، هودي يا سيد لو بموت كل الشعب اللبناني، مستعدين يجيبو غيرهم ومن غير بلدان، المهم يضلو بالحكم ويضلهم عم يقبضو ويسرقو.

صباح الخير يا سيد،

والسلام عليكم ورحمة الله وبركاته.