خواطر مبعثرة..

بقلم: مايا ابراهيم

ما تزعل إنّك إنت وهنّي مختلفين بالعكس انبسط إنّو ما في شبه بين القرش والدلافين قول الحمدلله على نعمة الوجّ الواحد بزمن الأقنعة المزيّفين كلّ يوم عندن هالووين الحمدلله على الصدق بزمن تمثيل المحترفين كلامن المعسول مجرّد إبر مورفين بيستخدمووا لمصالحن كرمال يضلّو بطريقن مكفّيين بس على مين خلص صارو مكشوفين ونحنا هالإبر ما عادت تاخد علينا ولا عم تقدر تخلّينا مبنّجين ياخدو نصّ مسرحيتن ويكفّوه مع غيرنا وجوهن بكلّ ألوانا حفظناهن صارو معروفين اتركن يكفّو طريقن أمّا إنت فاشكر ربّك إنّن انكشفو فقت من سُباتك وصحصحت وكإنّك شربان كافيين وما عادت تمرق علينا حركاتن تمر شجرن ما عدنا نشتهيه ولا عدنا علين ملهوفين صرنا شايفينن شجر مقطوفين.

🌺🌿🌺

لمّا يحكو عنّك مش معناتا إنت شخص سيّء بالعكس يمكن سيرتك بتحرّك بركانن والغيرة جوّاتن بتفيّق ، اعذرن مش قادرين يكونو متلك ولا قادرين يعطوك مطرح بقلبن لإنّو زغير متل عينن وضيّق ، بيكفي آخد عقلن وتفكيرن وهيدا الشي بحدّ ذاتو شيّق

🌺🌿🌺

اللي بيحكيلك عن حالو تفاصيل ما تكون بمسامعك عليه بخيل ، لو ما بيكنّلك الثقة والإرتياح ما كانت غيمتو بمنطقتك فرّغت حملا التقيل ، الغيمة بتمرق بمناطق كتير بس بتفرّغ حملا بمنطقة معيّنة وهيدا أكبر دليل.

🌺🌿🌺