صباح النور

الشاعر إبراهيم شحرور

يا بحر ودّيلي ” صباح النُور ”
عا بيتنا المشلوح عَ تْلال القهر
رح تعرفو من خاطرو المكسور
من غَصّةِ الشبّاك عَ فْراق الزهر

يا بحر ودّيلي ” صباح النور ”
عا موجتك … عَ جْناح شي عصفور
قِلّو يجبْلي غَفْوتي اللي غْفيتها
بْ فَيّ الشجر بعد الضهر
قلّو يجبْلي ضحكتي اللي نسيتها
بِ مْرايةِ الْأوضه اللي حيطانا زهر …

يا بحر وَدّي دمعتي عا ” صُور ”
مطرح مَ بيصبّ النهر
بلكي بتتلاقى بِ دمعَه بْكيتها
عا قبر إمّي بْ ” دير قانون النهر “