خواطر متناثرة

الكاتبة مايا ابراهيم

لا الزمن ل ورا بيرجع ولا أمتالنا بتركع ، الشموخ من دمّنا بينبع ، يعني مهما عصفت فينا الحياة تعصف ل تشبع حتّى لو كان ل عواصفا أجزاء وكتبت كلمة يتبع ، راسنا بالعالي وجذعنا مشرّش بالأرض أيّا هوا بيسترجي يقرّب منّا وشرش واحد يقبع ؟ ، مسلّحين بالإيمان يعني ما بتأثّر فينا ولا بتطبع ، الصلابة اللي فينا بتضلّ مرافقتنا حتّى بعد الروح ما تطلع

🌺🌺🌺

بالزمان اهتمينا فكّرو تملّكونا ما بيعرفو إنّو من لحظة ولادتنا لحزب الكرامة انتمينا وياما وقع منّا قطع ما التفتنا ولا لمّينا تمسّكنا فين بس هنّي اللي فلّتو إيدينا يعني إذا تجاهلناهن شويّ معليه من معاملتن انعدينا ، أمّا نحنا ضميرنا مرتاح عاملناهن متل ما تربّينا قمنا من مثاليتنا انأذينا
في ناس ما بتستحق العتاب ولا بينحطّ على عينا خلّين قاعدين مع حالن يمكن يلاحظو غيابنا إذا زحنا عنّن واختفينا ، وإذا ما لامو نفسن ما يفكّرو نقيّمن بالعكس منكفّي حياتنا وكإنّو ما التقينا.

🌺🌺🌺

ما تقول عنّن مناح لمّا يكون وضعك مرتاح ، ما تقول عن حدا منيح غير ل تكون إنت بعزّ الريح يا بيكون جبل بضهرك يا بيكون مجرّد ورقة أوّل ما نسّم عليك الهوا ل مطرح تاني بتزيح

🌺🌺🌺

تحيّاتنا لكلّ شخص بيكون بعتمتنا شمعتنا ، شو بدّنا بنورن بس تكون شمس الحياة منوّرتنا ؟

بدّنا تكونو وطن لمّا نحسّ بغربتنا مش نحسّ حالنا أيتام مع إنّو إمّنا بعدا عايشة بس بمزاجا تركتنا

.