نصائح هامه للمطبخ

 

💟. *موقع مجلة كواليس*

إعداد: زهراء 🌹

1-لو عايزة صابون المواعين بتاعك بالقوة الرباعية يعنى نضافة وتوفير وكمان لمعان وتطهير تعالى اقولك تجربتى الشخصية في زيادة صابون المواعين لأ وإيه بيوفرلى وكمان بيلمع وينضف ويعقم كله في وقت واحد انا هقولك بعمله أزاى هتجيبى زجاجة بريل فاضية وتحطى تلتها بالظبط اى سائل مواعين بتستخدميه انا عن نفسي بجيب الجركن الكبير وبيقعد عندى شهرين واكتر بس اتبعى الخطوات بالظبط هتجيبى الزجاجة الفاضية وتحطى تلتها صابون مواعين عليهم معلقتين كبار كربوناتو وربع كوب خل هيحصل تفاعل سبيه لغاية لما يهدأ وبعدين كملى الزجاجة ميه سخنة ورجيها هيبقى معاكى صابون مواعين مركز جدا وبينضف ويعقم بفعل الخل والكربوناتو 👍👌👏😊

 

 

2-تعالى ورايا وهاتى المكونات اللى هقولك عليها هاتى جركن كبير فاضي وحطى فيه كوب سائل مواعين بريل أو فيرى او اى نوع بتستخدميه وبعدين ربع كوب كلوركس ألوان ونصف كوب خل وكملى الجركن ميه مغلية ضرورى الميه تكون مغلية ورجيه واقولك يا ستى ده هينفعك فى ايه هينفعك جدا في تصنيف البوتجاز وكمان تنضيف السيراميك ومسح الارضيات وكمان غسيل الانتريه والسجاد على الناشف رهيب

3-لازم يكون عندك بخاخة فيها خليط من الخل والميه للتنضيف والتعقيم في أخر يومك لمعى بيها بوتجازك قبل ما تنامى وكمان الرخامة والحنفيات وحاجات كتيره ممتازة✔

4-المطبخ لازم يكون فيه فوطتين تلاتة على الأقل واحده تمسحى فيها ايدك وواحدة تمسحى بيها اى حاجة تبهدل البوتجاز والتالتة علشان تلمعى بيها الرخامة او اى حاجة تانى

5-الشفاط شوية كربوناتو على شوية خل وميه سخنة وسبيه يتنقع اقل حاجة ربع ساعة وبعدين ادعكيه بصابون مواعين هينضف ويبقى فل 😍👌
ونصيحة اعمليله تنضيف على الأقل مرة في الأسبوع عمر ما الدهون هتتراكم عليه وبشوية صابون مواعين هيبقى فلة

6-المطبخ الخشب اعمليله خلطة عبارة عن معلقتين كبار بريل على ربع كوب خل وفي بخاخة رجيهم كويس ولمعى بيهم وبعدين فوطة ناشفة وامسحى علشان ميسبش ترسبات اما المطبخ الالوميتال ربع كوب بريل على نصف كوب خل على عصير ليمون وحبة ميه ولمعى بيهم وبعدين فوطة مبلولة ومعصورة ونشفى هيبقى فلة شمعة منورة👈👏

7-علشان سواد فواصل السيراميك بعمل خلطة مفعولها ولا السحر ولا تقولى كلور ولا فلاش ولا الحاجات اللى بتتعب الصدر انا بجيب كميات متساوية من كوب كربوناتو وكوب ملح ليمون وكوب خل وكوب برسيل واربعة لتر ميه سخنة هيحصل تفاعل وهو المطلوب إثباته هتاخدى من الخلطة دى وتحطيها على الفواصل وتسببها ربع ساعة ولازم الأرضية تكون ناشفة علشان مفعول الخلطة يتفاعل كويس وبعدين هتجيبى فرشاة حمام وادعكى الفواصل واتفرجى على النتيجة وادعيلى🙏☺

8-علشان تشيلى الاستيكر من على البوتجاز أفضل حاجة الباور ولو مش متوفر عندك ميه سخنة من الكاتيل وصبيها على مكان الاستيكر من فوق هيطلع معاكى بسهولة او ممكن كمان مكواة او سشوار😍👍✔😉

9-البوتاجاز بعد كل طبخ امسحيه بسفنحه وصابون ولمعيه بفوطه او قماشه قطن يوميا اعتبريه زي المواعين عمرك ما هتحتاجي لمنظف