ما مدى الحقد والكراهية؟

عند كل مفترق، بترجع أصوات التخلف والجهل بترتفع، وتختفي أصوات العقل والمنطق.
فريق أعلن انه نازل عالعدلية احتجاج بنظره على تسيس ملف المرفأ. سقط ٧ شهداء وعدد من الجرحى، على يد مجرمين. هذا الفريق اتهموا علنا فريق آخر. رد احدهم انها ميني ٧ أيار مسيحية.
يعني رجع تاريخ الدم يلعب بالدم.
خليها تكون واضحة.
كل واحد بصنف الشهداء بمذهب، أو اهل عين الرمانة بمذهب بيكون عم يغتال الشهداء مرة تانية، وعم يهين اهل عين الرمانة.
الشهداء لبنانيي، وأهل عين الرمانة لبنانيي دخل بينهم مجرمين ما لهم علاقة لا بالله ولا بالمسيح.
الله والمسيح ومحمد وعلي أبرياء من كل من يقتل اي انسان على اساس مذهبه.
وليسمحلنا كل من عاد ورجع يحكي بتقسيم وغيرو. راجعوا التاريخ الدموي لكل المذاهب في لبنان، بتعرفوا بالأرقام ان الدم بقلب كل طائفة بين بعضها، اكثر من بينها وبين طوائف اكثر.
وللتذكير للمرة العاشرة، الأسئلة البديهية الآتية:
~ بس حدا يطالب بمنطقة للمسيحيين او للمسلمين، هل هيدا بيعني انو حيكون في دور للكنيسة مثلا بإدارة الحكم؟ اي كنيسة؟ واي بطريرك او مطران؟ هل يعني حكم ديني، وعلى أي مذهب؟ هل بيرضوا المسيحيين الآخرين من غير كنائس؟
اذا الجواب بالنفي ان يكون في دور للدين او للكنيسة، وانها تدار بمفهوم مدني، وفصل الدين عن الإدارة، ليش تصنيفها منطقة مسيحية. ممكن ناس مسلمين او ملحدين يحبوا يعيشوا فيها.
وهيدا بينطبق على المنطقة او المناطق الإسلامية.
~من قرر منطقة “للمسيحيين” ،و٣ مناطق للشيعة والسنة والدروز مثلا. ليش مش ٥ او ٦ مناطق للموارنة والأرثوذكس والكاثوليك والارمن والسريان وو، ومنطقة للمسلمين.
مين قرر ان كل الطوائف المسيحية بتقبل تعيش مع بعضها، والطوائف الإسلامية بتختلف. او العكس.
~ على العلم ان كل الاحزاب مصنفة حالها لبنانية، وغير طائفية. كيف فجأة بتصير مارونية وشيعية وسنية ودرزية مثلا؟
فليتوقف التكاذب والكذب مرة لنرى النور، والى أين.
هل يتعايش التيار الوطني الحر مع القوات؟ والقوات مع المردة؟ والمردة مع التيار؟ والكتائب او المستقلين، أو ما يسموا اولاد بيوت سياسية معهم كلهم؟
كمل على الباقيين. هل بيتعايش حركة امل وحزب الله بادارة واحدة، وهني على خيمة عاشوراء ما بيتفقوا، وبدون ما يؤتى على. ذكر المجلس الإسلامي الشيعي الأعلى، ومليون مصيبة. مين ما بيعرف انو وحدتهم اليوم على مصير مشترك، مش كيمياء واحدة.
وكذلك المستقبل مع كل الزعامات والشخصيات السنية، وكذبة رؤساء الحكومات السابقين، وكلهم بينتظروا بعض عالكوع.
وكمل عالدروز نفس الشيء. عندهم مشيختين للعقل واوقاف…
~ اخر شيء سؤال بسيط. اذا واحد مسلم او مسيحي او حتى ملحد، ما بدو يعيش بمنطقة مصنفة بدين او مذهب، وين بيروح. بيأخذ إقامة على المريخ مثلا؟ او بالتقسيمات ممكن تعطوا هذه الفئة من الناس شقفة من الوطن الممزق؟
خلصنا بقى. بسببكم يا متخلفين حتقضوا على بعض الإيمان المتبقي في النفوس. حتشككوا البعض ليش الله بعدو مقويكم على الناس، وقاهرهم.
بسببكم ولد لبنان مشوه، وكل سنة بيزيد تشويه، وقرب يموت.
يعني انتو يا متعصبين، مقتنعين وبدكم تقنعونا انو زعماء الطوائف لهالدرجة مؤمنين بالمسيح ومحمد وعلي والحسين. وانتو اغلبكم بتكرهوا بعضكم من نفس الطائفة.
قلنا لكم مليون مرة اسألوا حالكم قديش في بحساباتكم، وقديش فيه بحسابات الزعماء ورجال الدين.
والله العمى… كم مرة سقط شهداء، وبعدها بيعمل الزعماء مصالحة، ويصيروا الشهداء مجرد ذاكرة رقم… بتتذكروا حرب أهلية صاروا شهداءها مجرد ٢٠٠ الف قتيل. وبدكم بعد. قرفتمونا المذاهب والتعصب.
هل بتقبلوا الفيدرالية او التقسيم بين العقلاء والجهلاء؟
او بين المتعصبين والمتدينين، وبين المدنيين العلمانيين الانسانيين المؤمنين بالمساواة على اساس الواجبات والحقوق. حلم ليلة صيف وشتاء.
والا مع لبنان الواحد الموحد. لا وجود للأديان والمذاهب في الدولة.

حسن أحمد خليل، تجمع استعادة الدولة
١٦ تشرين الأول، ٢٠٢١