“رصاصة” هيام التوم

من كم يوم رحت أعمل بوتوكس لإنو عندي الجأرة اللي بالجببن حافرة خندق بالأصل ع إيامي وببيتنا ما كان في ثقافة العناية بالبشرة، لا واقي من الشمس، ولا كريمات، ولا حتى نظارات للشمس…
إمي طلعت بجهازها علبة ماكياج كبتها تاني يوم لإنو الوالد قلها بيحبها عالطبيعة
حتى بأعراسنا لما تحط ماكياج الكلمة الوحيدة اللي بنسمعها لو بلا هالتدهون ما كان أحسن وبقيت متلها…
لحد ما عدا السبت ولم يعد العطار قادر يعمل شي للي أفسده الزمن
إي بس العطار بهيدا الزمن صار بيشيل وج وبيحط وج
المهم رحنا نعمل بوتوكس أنا وصديقتي وحاسة بالذنب إنو حرب وضرب وفقر وهيك
ما إلكن يمين تحلفوني موعدنا تلاتة ونص فتنا ستة ونص موجود بصالة الانتظار ٢٧ أنثى الواقفين اكتر من القاعدين ذكروني بصف الخبز بالتسعينات وبصفوف البنزين بالأزمات، في تلاتة من الموجودين نازحين… صالون العيادة قد بيتي عمرتين في مرا وحدة غيرنا فوق الأربعين الباقي كلو بالعشرينات هلق أنا بما إنو جو غير جوي شغلت قرون الاستشعار تبع الروائي، وصرت أعمل سكان للوجوه والأجسام، وبتاني ساعة بلشت استجوابات، كلو جاي يعمل شفاف البطة ونحنا صرنا ديمودي ومتأخرين شي تلاتين سنة، يمكن الحكيم صرلو زمان ما شاف وج طبيعي قبلنا…
وحياة الله صبايا من عمر بنتي، حلوين وناعمين، شو جايبهن يعملو تجميل، شي شفاف، شي دقن، شي نفخ، صرت فكر هلقد بطل عنا قناعة بخلقة ربنا؟ هل كلن بحاجة لحدا يحبهن متل ما هني ؟ مين اللي حط النموذج وقنع الكل يتمثلوا فيه؟ وأسئلة كتير…
المهم بس فتت عرفت ليش عم يجوا، الحكيم بيقرب الله حرفيا، ولا غلطة، ٢٥/٢٠😂
أنا رح أنسف كل معتقداتي عن جمال الروح وكل تربيتي عن الجمال وكل يوم رح إجي أعمل شي تجميلي مع إنو صعب يلاقي شي يتصلح😂