بقلم الشاعر الكويتي جراح الخلف
ما هو بكيفي طفت بك هالمسافات
مليت اشوفك يا بحر راحتيني
غصبن علي ساريك عمري الذي فات
كل المواني حالفه ما تبيني
انا الغريب وعيشتي بالمتاهات
وين المنافي؟الا انا احترت ويني
صحت الفرج رد الفرج قال هيهات
صبرك يشيب ولا تصافح يميني
اللي حسبته امس باحساب الاموات
لو ينطعن مليون ما يشتكيني
يعني ولو زادت على القلب طعنات
مهتم لو طعنت خوين تجيني
شفني أوزع فالعيون ابتسامات
اضحك وحزني يا بحر محتويني
ويني انا ووين الفرح والمسرات
والمشكله يا كثرهم حاسديني
احلام عمري يا بحر راحت اشتات
والياس اطفى بي سنا نجمتيني
الا انت ما تقسى علي انت بالذات
وان بعتني لوحي كسرته بديني