(٢٠٢٣) وقَع فجأة الزّمان !

عبد الغني طليس

ما فيك ما تسأل لَ ألله
ليش هالأرض العظيمة الغالية
بتقلُب عَ أهلا كلّ مرّة
متل قلْبِةْ بهلوانْ؟

ما فيك ما تقلّو
شُ رأيك بعد ما تشوف البشرْ
تحت الحجرْ
لا عيونهن إلها عيون
وْلا مطَارحهن..مَطارحْهن
وَلا عم يفهَموا ..
مِنْ شو وَقع فَجأة على وِجُّو الزمانْ؟

ما فيك ما تسأل لَ ألله
وين إيديك اللي قالوا الأنبيا
كِلّا حنانْ ؟

وين المَرا والطفل والشيخ
وشبَاب الحيّ
وجْنينِة زَرعنا مبارحة فيها
ورِد جُوري
وحَبَق
عا كعب شجرة كان إسمَا بَيلسانْ

أرواح ما إلها عدَد
كانت متل جيش العرَمرَم
عَ السّما طالع مَشِي
بيأوَّلو
وبيآخرو
رفْعوا الرايات البِيْض
حتى يعرّفوا عن حالهن
إِنّن رَعِية صالحة
وما في بإيدُن صَولجانْ

وربَّك ..إذا بتقتُل بَرِي
بيحَمّلك دمّ الخلايق كلّها ..
كتيرة إذا منسأل بِرَقبةْ مين
هَالْقِتْلو سوى
والّلي بْليلة تشرّدوا
وحَسّوا السّما
مش رح تضلّا واقفة خيمةْ أمانْ؟

وصار القَوي
مْخَبّا بدمعات الجَبانْ

وقديش بدّو مْن العُمُر
إلّلي بقي طيّب
تَ يمحي مُختَصر يوم القيامة مِنْ خَيالو
ويشفَق النسيانْ ؟

وقولَك إذا بيطلع حدَا
من تحت هالباطون
رح يرجع عَ بيتو عارف العنوانْ؟

مأكّد أنا …
ألله بيسمع
بس ما بيجاوب ..
بْيُنطُر لحتى يجاوب الإنسانْ !