شجر و تراب

خضر حيدر

بتلوم حالك
ليش ما تعمِّر قصر
والقصر لابقلك
هيك الحبر قلَّك
والحبر صار كتاب؟…

مشغول بالك
كيف بتقضّي العمر
راكض ورا حلمك
وبتكبر الحسرة
وبتكتر النطرة
تا ينفتحلك باب؟…

معليش، هَيْ حال الدني
كل حرف ماشي ع سطر
تا توصل الكلمي
ما فيك حدَّا تنحني
ولا فيك تؤمرها أمر:
قومي اذكري إسمي
والإسم ما لو حساب…

مهما تعلّي هالسقف
فوقو سقف
فوقو قمر ضوّو لمع
ما يوم من عرشو وقع
أو يوم ظنُّو خاب …
حتى الشجر مهما ارتفع
بدّو رضا لِتراب !