حكومة التسوُّل والاستجداء

✍️ علي خيرالله شريف

الرئيس نواف سلام كان عم يصرح ويتغنى إنو رجع للحضن العربي
وأمن للعرب الأمن والرفاهية ورجع المطار متل ما بدهم (وكأنو المطار كان موبوء)

فكرناك عم تقول رجعنا الكهربا ٢٤ عا ٢٤
واستخرجنا الغاز
ولمينا النفايات
وأمنا فرص عمل للمتخرجين وللعاطلين عن العمل
وفكرناك عم تأمِّن خدمات للبنانيين وعم تنشِّطلهم الزراعة وتحميلهم منتجاتهم من الاستيراد
وفكرناك عم تنشط الصناعة والتجارة وتزيد الانتاجية وتعمل اقتصاد منتج غير السمسرات والشحادة، وتعملهم أمن واستشفاء ونقل عام وسكك حديد.
وفكرناك عم تقول سلحنا الجيش وزودناه بوسائل الدفاع عن الوطن
وطَلَّعنا الإسرائيلي من الجنوب ومن أجواء لبنان

• وقدام الإعلام، فكرناك رح توَقِّف حدك وإنت عم تصرح، رئيس حكومة متلك أو ولي عهد أو عالقليلة وزير،
  بس للأسف لقيناك واقف حد سفير رافع راسو عليك متل كأنو معلمك وولي نعمتك (السفير السعودي)
  وعم تتباهى إنك عملت كل شي بيرضي اصحاب الدشداشات والشحاطة بإصبع، حتى يجوا عا ملاهي لبنان ويجمعوا حواليهم الرقاصات ويفتوا ريالات عالسكرة…

مبروك يا دولة الرئيس وما بقي عليك إلا تفتحلهم المزيد من الملاهي والعلب الليلية وبيوت بائعات الهوى. إنت بتعرف إنو هول بيحبوا الهوى كتير وبيرقصوا عالهوا وبيفتوا ريالات عا هوى ما يشيل… فقط بدهم مين يشمرلهم ويترقوص حواليهم وشوف الفلوس كيف بتنزل متل الشتي وبتتطاير مع الهوا.

والله يا دولة الرئيس أذليتمونا قدام الناس، وعملتولنا دولة خفيفة متل الهوا… وقايمة عا أكل الهوا.

عا فكرة يا خيي نواف، إنت ملاحظ إنو كل ما كتروا السياح الخليجيين عا لبنان، بيكتر قصف العدو إلنا وبتكتر الطيارات المسيرة بسمانا؟
مبروك عليك الحضن العربي المعروف التركيبة والسياسة والانتماء. يا عيب الشوم عا هيك حضن ما بيعرف الله وين حاطو.

الخميس ٨ أيار ٢٠٢٥