حقي_إورث

خلق خيي بعد اربع بنات، كانوا اهلي يركزوا على فكرة انه ممنوع نضرب بعض، كتير مليح مبدأهم مع انه كل الأطفال بيتخاصموا وبيتقاتلوا وبيرجعوا يتصالحوا.

بيوم اختي ضربت خيي، اجا عالسريع بيي ضربها كتير لحد ما تعبت من البكي ونامت دموعها مرويين تيابها.

مرقت الايام وكنت انا عم اشطف البيت وصرت رح خلّص، اجا خيي من برا وحذاؤه عليه وحل وما قلعه قبل ما يفوت ووسخلي الأرض، قلتله: يا الله شو عملت؟ ليش ما بتشلح برا… قالي: انا حر وانت هيدي شغلتك تنظفي ورايي. قلتله: هلق منتحاسب عند اهلي. قالي انا يلي بدي حاسبك، صار يضربني بالبوكس على راسي ووجهي لحتى بلش يسيل الدم وانتفخ خدي على ميلة وحدة.

اجا بيي، شكيتله، كنت واثقة انه رح يعاقبه بس تفاجأت بقوله: اتجنبيه انا ما بقدر اضربه. زعلت من بيي وخاصمته اسبوع بعتلي تهديد مع امي انه بدو يحرمني من الجامعة، قلتلها اوك وانا رح خبر اهل الضيعة يلي بيي حريص يكون ملاك قدامهم عن ممارساتكم بالبيت بالتمييز بكل شي… باللهجة، والأكل والمصروف والعاطفة والضرب والشغل… اهلي كتير حريصين على سمعتهم بالانفتاح بين الناس، تراجع بيي عن قراره بعد تهديدي. اي شو لكن انا بطلع الأولى بصفي وخيي بيعمل السنة مرتين وبيطلعها شحط.

خلصت جامعة وصرت اشتغل وساعدهم بتلت معاشي، بعتلي مع امي انه بدو كل المعاش وهو بيعطيني مصروفي ما قبلت وخاصة انه شفته شو كان يعطي لخيي مصاري من شان أمور تسلية…

باع شقفة ارض وزوّجه، ورجع عطاه الاراضي وصار خيي يبيع شقفة ورا التانية قدام عيون اهلي. فات بيي بإكتئاب حاد وهلق عايش على أدوية الأعصاب وبيضل يقول: يا ريتني وقفت عند آخر بنت.

ملاحظة: بيي ما اخدني عالطبيب لما كان وجهي مورم ومع الايام اكتشفت انه فيه كسر بالعظم.

 

شاهد أيضاً

أخيرا.. العلم يكشف سر أقوى كائن حي في العالم

  ربما تكون الكائنات المسماة بطيئات المشية، هي أكثر الحيوانات غير القابلة للتدمير على وجه …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *