صرخة جوع من طفل جعان

شاعرة القضية ديدي

صرخة جوع من طفل جعان
ياللي نويتوا تصوموا رمضان
هاتصوموا بس لحد المغرب
والمطبخ طبعآ عمران
لو حسيت بالجوع في صيامك
هاتعوض بطبق مليان
يعني هاتفطر عالساعة ستة
أطفال غزة ..
اللقمة بتتفرق على ستة
و إن خد حتة ..
مش عارف التانية تكون إمتى
أطفال غزة ماتت م الجوع
لا غدا .. ولا عشا … ولا فطار ..
يعني يصوموا ومافيش مدفع للإفطار
ياللي لبستم توب العار
إنتوا حسابكوا هايبقى عسير
خذلانكم مالهوش تبرير
أطفال غزة بتدعي عليكم
ومش هايسامحوا في التقصير
مش هايشيلوا فوانيس رمضان
ولا هايغنوا حالووو يا حالوووو
هايغنوا موال أحزان
عاللي عن نصرتنا إتخلوا
إللي لا مقبول منهم صوم
ولو هايقضوا العمر يصلوا
عيشوا .. واشربوا .. وكولوا .. و حلوا
هاتوا لولادكم لبس العيد
و اتعطروا.. و بالزينة إتحلوا
وقولوا لولادكم إوعوا تخافوا
كل مشاكلكم .. إتحلوا
وماتنسوش تقولولهم برضه
إن زمان كان بينا روابط
وعشان مصالحنا … إتحلوا
كل روابط الوحدة .. إتحلوا
حالوووو .. يا حالوووو
العرب … إتحلوا
وحاوي يا وحاوي … اليوحة
يا صراخ أطفال مجروحة
لا حاوينا الدار .. ولا عاد لنا دار
والأرض بدمنا .. ممسوحة
جيت يا رمضان …. اليوحة
وبقينا كربان …. اليوحة
بنموت م الجوع … والصوت مسموع
والفرجة بقت مسموحة
وحاوي يا وحاوي……… اليوحة
وحاوي يا وحاوي………. اليوحة

https://vm.tiktok.com/ZGeDdhGWg/