هيدي الدني

خضر حيدر

بيضا الدني
لمَّا تكون منوَّرة
ومصوَّرة فوق الشمس
والليل عميحكي همس
والصبح ضحكي مزيَّني…

خضرا الدني
لمَّا شجرها يعشقك
ويرافقك طول الزمن
ويعلَّقك فوق الغصن
تا يذكَّرك بالولدني…

حمرا الدني
لمَّا جنونك يحلما
ويطيِّرا فوق السما
وينغِّما…ويرنِّما
آهات حلوي مدوزني…

زرقا الدني
لمَّا الشِعر
ورقة على موج البحر
تاخد حنينك للمدى
ويعود بحروفك غني…

غبرا الدني
لمَّا تشوفا محيَّرة
ما بتنقرا
بتحس بعيونك مرق
نجم احترق
وتقول: مدري شو بِني…

سودا الدني
لمَّا العتم يلعب معك
ويوقَّعك
أو يخدعك تا تلحقو
وبتلحقو بيرجَّعك
تعبان ضهرك منحني…

هيدي الدني
ألوان…عمرك راسِما
مرَّة أرض
مرَّة سما
ومقسِّما ع كم سني!