طبق بزاف بنين بالبطاطا و الدجاج

المقادير:كيلو بطاطا🥔 أي 5 حبات متوسطين،نصف صدر دجاج🐔،حبة كبيرة بصل🧅،2 حبات زرودية🥕،كاس صغير جلبانة طايبة🫛،مغرفة معمرة طماطم الباطة🥫،2 فصوص ثوم🧄،ملح ،فلفل اسود عكري، مغرفة كبيرة و نص فرينة،كاس ماء سخون🥛،
طبقة البطاطا؛نص كاس كريمة الطبخ(نقدر نعوضو بثلث كاس حليب)،بيضة صغيرة،جبن مبشور و شوية ملح،2 مغارف زبدة و شوي فلفل احمر
-نقطع الدجاج مكعبات صغيرة نقليه في شوية زيت كينشف نضيف البصل مقطعة مربعات صغيرة و الزرودية مرابية بالخشين تقدرو تستغناو على الزرودية نضيف معاهم الملح ، نغطي المقلة و نخليهم يطيبو على نار قليييلة كيذبال البصل ندير حفرة في الوسط نكب مغرفة تاع زيت و نضيف عليها مغرفة كبيرة طماطم الباطة نقليها مليح مليح مليح حتان تتنحا الريحة نتاعها مبعد نضيف الثوم و التوابل بعدما طاب كلش نضيف مغرفة و نص فرينة نخليها تتقلى شوي مبعد نضيف كاس من الماء الساخن كاس تاع 250 ملل نخليها تنشف و تثقال مليح و نطفي عليها
الطبقة الثانية:نقطع البطاطا مربعات نديرها طيب في ماء و شوي ملح مبعد نهرسها بالباتور أو الفرشيطة و هي سخونة ،نضيف نص كاس كريمة الطبخ تمدلها وحد البنة نقدر نعوضها بالحليب و نزيد فص ثوم بيضة صغيرة اذا كانت عندكم بيضة كبيرة ديرو غير الصفار و نضيف الجبن اللي يبقى اختياري ،ديما في هذو الوصفات نضبطو كمية الملح🧂
ندهن المول بالزبدة ندير الطبقة لولة تاع الجاج نعدلها و نضيف الطبقة الثانية تاع البطاطا نسويها بالسباتي حتان تولي قد قد ندير خطوط بالفرشيطة مبعد نذوب زوح مغارف زبدة مع شوي فلفل احمر و نحبها من لفوق باش تعطي طبقة مقرمشة و بنينة بنينة ندخلها للفرن تغراتينا غير من لفوق حتان تولي الطبقة الفوقانية حمرة و مقرمشة و مبعد نطفي
نخليها تبرد شوي نقسمها و شهية طيبة