اعذروني

الكاتبة بداية سليمان

اعذروني رح اشلح حجابي وفكفك ازرار الصّمت هالمرّة

ورح اترك للهوا ثيابي يلعب بالأرزة ويخربط الغرّة

اعذروني كثر ما عم شوف ناس كذّابي صارت الكلمة مُرّة

وصرت من كثر ما حولي وحوش بهالغابة صفّيت أنا برّا

اعذروني سكتت يمكن بالذّهب طمعاني

علّموني إنّو الحكي فضّة والسكوت ذهب ومرجاني

مدري سكتت من خوفي من فلتات لساني

تاري السكوت عليّي انتفض ووعّى فيّي وجداني

والأبجديّة تحرّكت وصارت تحكي بلساني

تعتب وتلوم ع صنّاع الحرف وتذم كل لبناني

تذم اللي شاهر سيفه ع خيّو وفاتح هالوطن دكّاني

وتعتب ع كل حدا خيّط الفتنة بلون ت صابنا عمى الألوانِ

وتنده من بين لهيب نيران سعراني

يا اولاد الأبجديّة ويا داحرين صهيون من جنوب اللّيطاني

كونوا بالشّدّة مثل هاك النّار اللّي حرقت الغابات البقياني

كونوا بعز تشرين ورد الرّبيع مفتّح زرار بأرض عمراني

لبنان يا وطن الغار بتستاهل تعيش حياة بالعزّ والشّرف ملياني

والأرض ما بتحبل حرّيّة ولا بتخلّف انتصار بلا زنود الجيش اللّبناني