ابن جاحد ..!

إعداد علي منير مزنر

بدي أرفع قضية حجر على أبوي …
شو الأوراق المطلوبة؟؟؟؟؟

اكتب عندك الأوراق المطلوبة :
١-صورة لأبوك وهو بيركض ماخد أمك عالمستشفى عشان تولدك .
٢. صورة لأبوك وهو شايلك يوم ميلادك الأول وهو فرحان ومبسوط فيك ..
٣.صورة كمان وهو مروح من الشغل تعبان وعرقان ومقهور عشان يأمن الك ولاخواتك الأكل والشرب .. والملبس .. والمصروف..
٤.صورة لأبوك وهو بيركض فيك للمستشفى بنص الليل وبعز البرد عشان عليك حرارة.ولما يرجع البيت صورة وهو قاعد عالأرض تحت سريرك وكل شوي يلمس جبينك يتأكد من حرارتك ..
ولما يصير إمساك فيك .. ثم تخرج .. يرتاح أكثر منك ..!
٥.صورة وهو متحمل تعب وقهر الدنيا والشغل والرجال .. عشان يجيب لك اللقمة الحلال حتى توقف على اجريك وتصير زلمه قد حالك .. كما أنت الآن ..
٦.صورة لأبوك قبل العيد بشهر وهو بيفكر كيف يشتري لك ملابس العيد وهو ينتظر فرحه عيونك وأنت حاضن الملابس والجزمة الجديدة .. وتنام فيهم .
٧.صورة سرية لأبوك وهو بيمسح دموعه اللي اختلطت مع عرقه قبل ما يدخل البيت عشان ما حدا يشوفه بيبكي الظلم .
٨. آخر صورة وهو يستدين مصاري عشان يدفع رسوم دراستك ..
ويشتري لك تلفون ويصير معك فيس بوك .. تكتب فيه منشور ..وتسأل عن الأوراق المطلوبة لرفع قضية حجر عليه ..
لأنه كبر .. وصار بينسى .. شوية .. من كثرة استهلاكه لعقله .. وتفكيره ليل نهار .. كيف يسعدك .. ويسعد إخوانك ..!
اللعنة على هيك .. ولد
وعلى هيك ابن ..
لكن افعل ما يحلو لك .. يا ولدي ..فكما تدين تُدان .. والدنيا دوارة ..!!