يا امي كيفك

بقلم ناجي امهز

نيالك يا امي انت فوق بالسما
ونحنا يا امي انا وغالبية اللبنانية صرنا تحت التراب.

كنا نقول عن يلي فوق الله يرحمكم
والله يا امي صار بدنا من يلي فوق يدعولنا انه الله يرحمنا.

شو بدي خبرك يا امي
صدقيني الولد المليح المنيح المرضي، يلي بشوف امه بهيدي الايام قلبها عم يحترق عليه وهو لا قدر يلاقي شغل او يتزوج او يفتح بيت حتى يفرحها بحفيد صغير، بقول يا ريتني ما خلقت حتى ما شوف قلب امي عم يوجعها علي.
يا امي الولد يلي كان يفرح القلب، صارت الام بس تطلع بابنها وتشوفه قصران، لا قادر يشتري قطعة تياب جديدة، ولا حتى قادر يروح مشوار او حتى انه يضحك، بتبكي عليه من حزنها عليه، حتى بايام الاعياد.

يا امي بكملك، الامهات يلي على الارض بطل بدهن هدايا بعيد الام، وبطل بدهن شي من اولادهن، الا انهن يحسوهن انهن بخير.

امي انت قريبة لربنا اكتر مني، قوليله ما ينسى غالبية الزعماء واصحاب البنوك واولادهم يلي ظلموا هالناس وذلوها، وسالي ربنا ليش بعد ما طبق عدالته على الارض، وليش ما بخلي الزعماء واصحاب البنوك واولادهم يلي بكوا الصغار والكبار يبكوا يعيشوا يلي عم بعيشوه الفقراء بلبنان.

امي بدي اعتذر منك لازم قوم برم على لقمة خبز، وشوف من وين جيب حق الكهربا، لان يامي البيوت بلا كهربا متل القبور، بس الحمد لله الزعيم عنده كهربا وخبز.

وقبل ما انسى يا امي رفيقتك، امبارح توفيت اذا شفتيها فوق بالسما ما تساليها كيف وليش ماتت، لان يا امي يمكن تزعل من ربنا لان خلقها فقيرة وتركها تموت فقيرة، مع انها كتير معترة، ولان يا امي رفيقتك فقيرة ما كان معها حق العلاج، يا امي عنا بلبنان الواحد مش قادر يفوت على المستشفى، وكمان ما بلاقي دوا حتى يموت بلا وجع،
مطلوب يا امي انه اللبناني بموت وهو موجوع، وفوق الموتة عصة قبر.
اخ يا امي اخ.

سامحيني يا امي صار عيدك متل الاعياد العادية يلي بينقال فيها،

عيدٌ بِأَيَّةِ حالٍ عُدتَ يا عيدُ
بِما مَضى أَم بِأَمرٍ فيكَ تَجديدُ
أَمّا الأَحِبَّةُ فَالبَيداءُ دونَهُمُ
فَلَيتَ دونَكَ بيداً دونَها بيدُ
لَولا العُلى لَم تَجُب بي ما أَجوبُ بِها
وَجناءُ حَرفٌ وَلا جَرداءُ قَيدودُ
وَكانَ أَطيَبَ مِن سَيفي مُضاجَعَةً
أَشباهُ رَونَقِهِ الغيدُ الأَماليدُ
لَم يَترُكِ الدَهرُ مِن قَلبي وَلا كَبِدي
شَيْئاً تُتَيِّمُهُ عَينٌ وَلا جيدُ