السمكة

حسن عليّ شرارة

لُبناني تْصَيَّد سَمْكِة*نْهارِ مْبَارِح قَبلِ العَصر
عَجّلْ شَالا مْنِ الشَّبْكِة*وأَعطاها لِشْريكةْ عُمر
صَارتْ تِحْسُبَ عَالبَرَكِة*زَيْتْ وْغَازْ وْخِبْزِ وْجَمْر
صارِ الْمَقْلَى بْهَالزّرْكِة*لِلمِسكِينِ بْقَطْعِةْ ظَهْر
عِمْلِتْ مَعْ زَوْجَا عَرْكِة*وْقَالَتْ لُهْ بِحَسْرَةْ وْنَبْر
حْرَقْنا سِلّافِ التّرْكِة*وطَيَّرْنا مْعَاشُو لِلشَّهْر
شُو بَدْنا بِ هَاللّبكِة*ارْكُضْ رَجِّعْهَا عاَلبَحْر
قَالتْ بِسِرَّا السَّمْكِة*عِشْنا وْشِفْنا نْجُومِ الظُّهْر
دَوْلِتْهُم بَدْهَا فَرْكِة*وْمَسْؤُولَا حَاكِمْ بِالعٌهْر
عَوَّفو الشَّعْبِ التّنْكِة*ومَوّتو النّاسِ مِنْ القَهْر
كِلُونِي سُوشِي بْحَسْكِة*نَيِّة بْلَا مِلْحِ وْلَا بَهْر
مَا إِنْتُو صِرتُ الْبَرْكِة*مِتلْ حَالِتْنا بِالبَحْر