خيبة أمل تحملك إلى أزمة ثقة

✍بقلم الشاعرة سينتيا سماحة 

بخيب أملك وقت تلاقي حالك صادق وإنتَ عمتنزف بكذب وخداع الناس لفتحتلاّ قلبك وبيتك.
بخيب أملك ع وقتك لعطيتو لناس لا قدّرت الصّحبة ولا الإحساس.
بخيب أملك وقت  بتجمع الأحبّة  بعد لقاء طويل وبتنهدم بلحظة دون إنذار.
بخيب أملك مع الأصدقاء لأكلت وشربت معها وقت طويل   وبتعطيها قيمة أكبر من حجمها.
بخيب أملك على العشرة ووقتك الثمين وما أبشع الخيبة لبيشرب من بيرك وبيرمي حجر فيه.
خيبة الأمل هي عنوان كل بيت، كل إنسان، كل شب وصبية، كبار صغار.
خيبة الأمل هي كنز لبتشوفا بكلمة “أمل”  ممكن تحسّن مش تخرب ..بس لسوء الحظ  الخيبة أقوى من إنَّ تكون حبّة الامل موجودة.
متل الخير والشر ذات  المعنى والمضمون  بس بطرق مختلفة بتأذي أكثر  لأنك بتلمسا  وبتصيب  بالصميم المباشر و غير مباشر.
خيبة الأمل  بتعلّم دروس كثيرة متل أزمة ثقة وعدم الوثوق  بالبشر  من قريب وبعيد للأسف.
بخيب أملك وظنّك وقت تحبّ وتقدم كل شي عندك ياه من إحترام وتقدير ومشاعر  وفتح إيديك  للمساعدة أو الحضن..بكون بوقتها مدبّر الأذى الندم والبعد والبكاء وإرجاع للذات.
كرمال هيك كتبت عن قانون أزمة ثقة تحملك إلى خيبة الأمل  دمجتن مع بعض لأنن من نفس الفصيلة والمعاني  والوجع ومنجرب نتعلم من حسناتها وسيئاتها ونعرف كيف نحمي نفسنا من ضرباتها  غير المنتظرة.
بخيب أملك بس تكون على ثقة بشخص ويخونك إن كان بالعمل أو العلاقة  أو بالتصرف.
بخيب أملك بس تنطعن بضهرك  من أقرب الناس إلك وتكون ماشي قدّامهم وفاتحلن طريقهم.
بخيب أملك لمّا تحس ّ بالنكران للجميل  واحساسك بالخذل.
قانون خيبة الأمل واسع بكل معايره ومعانيه.
ما بخيب أملك بس تلتجأ ل الله وحده بعوضلك وبخفف عنك هذا العبىء وبيفتحلك أبواب جديدة من الآمال  والثقة  بالنفس أكثر وأكثر.
هو الباب الوحيد  القادر على مساعدتنا لتخطّي أزماتنا اليومية.