مجلة كواليس www.kawalees.net مجلة كواليس www.kawalees.net
إعداد حلا الشام
غسان كنفاني : شو إللي خلاك ترسم الخيمة على شكل هرم. يعني شو علاقة الخيمة بالهرم؟
ناجي العلي : فيه علاقات مش بس علاقة واحدة. شوف يا سيدي.. أولاً إحنا الفلسطينيين منتميّز بالخيمة زي ما المصريين بيتميزوا بالهرم. يعني لما تقول خيمة بتقول فلسطين، ولما بتقول هرم بتقول مصر.. يعني هما خِتْمهم الهرم وإحنا خِتْمنا الخيمة.. مزبوط هيك؟
هزّ كنفاني رأسه علامة القبول، وتابع العلي يقول:
ـ ثانياً، الهرم والخيمة مكان للسكنى إلهم وإلنا.. بس هُمه بيسكنوها في موت الحياة يعني علامة للخلود، وإحنا بنسكنها في حياة الموت يعني علامة الإصرار على العودة، وللخلود كمان، وحتى تظل قضيتنا حمرة متل الجمرة. ويوم ما إنضُبْ هالخيمة ونلفها، منضُبْ فلسطين وبنلفها كمان. صح هيك، ولا لأ؟
ـ هاي فلسفة كبيرة يا ناجي، منين جبتها؟
ـ والله من هالدنيا.. هالدنيا علّمتنا إشيا كثيرة. هوه قليل اللي شفناه واللي خبرناه؟ عليم الله يا زلمة اللي شفناه بيعلّم العالم كله، مش بس إحنا!
وتابع العلي :
ـ ثالثاً: العلاقة بين الهرم والمخيم، يعني ختمنا وختمهم، جاية من إنو مفيش تحرير لفلسطين بدون مصر، يعني بصراحة.. لا نصر من دون مصر!
ـ وبشوفك سياسي كمان؟
ـ ما قلنالك يا زلمة، هالدنيا علمتنا كل إشي. عليم الله هاذا المخيم لحاله فيه عِلْم أكثر من الجامعة الأمريكية اللي بيحكوا عنها ببيروت!
ـ بعدين يا أستاذ، العلاقة بين الخيمة والهرم إنهم مش ممكن يكونوا إلا في الخلا.. وواضحين تحت السما مباشرة، متل الشجر. هلاّ قول لي، في حدا بيبني خيمة جوّه بيت، ولا هرم جوه بيت، ولا بيزرع شجرة تحت سقيفة؟
كنفاني : وبعدين معاك… إنت ما خليت إلنا إشي نقوله، على مهلك يا زلمة، خلينا نحكي شوي!
ـ واحدة وبس.. ما إنت إللي سألت يا عمي، وبدنا نجاوبك ع المزبوط!
ـ العلاقة الأخيرة، هي العلاقة بين حجر الهرم وقماش الخيمة!
ـ شو يعني.. مش فاهم؟
ناجي العلي : ما بيرجّع فلسطين غير هالحجر!
وما بيطلع هالحجر إلا من هالخيمة.. لا من قصور ولا من علالي، وسلامة تسلمك!
حوار الشهداء #ناجي_العلي و #غسان_كنفاني في معرض للرسم في #مخيم_عين_الحلوة
