للشاعر: علي الحسيني
♥️♥️♥️♥️♥️♥️♥️
أوعي تقولي بَدِّك هدِيِّه
بظروف صَعبه إقتصاديِّه
رَح صارحِك يا حِلوتي بسَطرَين
ما تِزعَلي ولا تِعتَبي علَيّي
ما بحِب إتزَيَّن بقِرش الدَين
وبالمَصرِف مجَمِّد مَصاريّي
صَرلي مِن طلوع الصُبح شَهرَين
بوقَف عَباب البَنك يَومِيِّه
وممنوع إسحب بالشهر من وين
ما كان أكتر من خمسميه
ما زال هَيك الوَضع عالحالَيْن
بعيد العِشق يا عايشِه فيّي
من الشِعِر رَح بِكتُب إلِك بَيتَين
مَقطَع قصيده بحِبِر عَينَيي
ولَو يسألوكي هالقصيده منَين
إحكي الحقيقه متل ما هيي
وقولي حبيبي لْ بالقَلب والعَين
جَبلي بعيد العِشق والعشاق
أجمَل قصيدة عِشق عيدِيّه
الشاعر علي الحسيني مع الفنانة المبدعة اميمة الخليل
التي اعجبتها القصيدة كمشروع تعاون..!