كتب محمد الماغوط، 🛑 وجع الكرامة

دكتور : إذا بتريد بدي تستأصلّي كرامتي …
– ﻛﺮﺍﻣﺘﻚ؟؟؟ نظر ﺍﻟﺪﻛﺘﻮﺭ الى اﻟﻤﺮﻳﺾ ﺑﺎﺳﺘﻐﺮﺍﺏ
– إي ي ي ي ﻛﺮﺍﻣﺘﻲ …. ﻣش إﻧﺖ ﺩﻛﺘﻮﺭ ﺟﺮّﺍﺡ ﻭأﺷﻄﺮ ﻭﺍﺣﺪ ﺑﺎﻟﺒﻠﺪ ﺑﻤﻌﺎﻟﺠﺔ ﺍﻷﻭﺭﺍﻡ ﺍﻟﺨﺒﻴﺜﺔ؟
– إي ﺑﺲ!!!
– ﺩﻛﺘﻮﺭ ….ﺻﺪّﻗﻨﻲ ﻣﺎ ﻓﻲ أﻭﺳﺦ ﻭأﺧﺒﺚ ﻣﻦ ﺍﻟﻜﺮﺍﻣﺔ …. ﻭأﻧﺎ ﻛﺮﺍﻣﺘﻲ ﻛﺘﻴﺮ ﻋﺎﻟﻴﺔ.
– ﻃﻴّﺐ ﺣﻜﻴﻠﻲ شو عم تحسّ.
– ﻣﺸﻜﻠﺘﻲ إﻧّﻲ ﻋم حسّ .. ﻣﺎ ﻋﺎﺩ ﺑﺪﻱ ﺣﺲّ.
ﺍﻟﻜﺮﺍﻣﺔ ﻣﺆﻟﻤﺔ يا ﺩﻛﺘﻮﺭ
أﻧﺎ ﻣﻬﻨﺪﺱ ﻭﺍنخربت ﻋﻴﺸﺘﻲ بهل حرب.
ﻭﻛﺮﺍﻣﺘﻲ ﻣﺎ ﻋم تخلّيني ﻣﺪّ إﻳﺪﻱ ﻟﺤﺪﺍ ﻣﺸﺎﻥ ﻃﻌﻤﻲ ﻋﻴﻠﺘﻲ.
ﻛﺮﺍﻣﺘﻲ ﻣﺎ عم تخلّيني ﺍﺷﺘﻐﻞ عتال.
ﺑﻴﺘﻲ ﺭﺍﺡ، ﻭ ﺻﻔّﻴﺖ ﺑﺎﻟﺸّﺎﺭﻉ.
ﻛﺮﺍﻣﺘﻲ ﻣﺎ عم تسمحلي ﺍﻗﺒﻞ ﻣﺴﺎﻋﺪﺍﺕ من حدا.
ﻭﻗﻔﺖ ﺳﺎﻋﺔ باﻟﺪّﻭﺭ ﻟﻌﺒّﻲ ﺗﻨﻜﺔ ﻣازوت ﻣﺒﺎﺭﺡ.
ﺍﺟﺎ ﻭﺍﺣﺪ ﺷﻐﻠﺔ ﻛﺒﻴﺮﺓ ﻭﻗﻒ ﻗﺪّﺍﻣﻲ ﺑﻼ ﺩﻭﺭ ﻭﻋﺒّﺎ ﻋﺸﺮ تنكات.
ﻛﺮﺍﻣﺘﻲ ﺻﺎﺭﺕ ﺗﻨﺨﺰﻧﻲ، ﺻﺮّﺧﺖ ﻭ ﻋﻴّﻄﺖ
وأكلت قتلة، ﻭﻛﺮﺍﻣﺘﻲ ﺻﺎﺭﺕ ﺑﺎلأﺭض وجسمي ﻟﻬﻠّﻖ ﻋم يرﺟﻒ.
– ﺍﻟﻌﻤﻰ ﻛﺮﺍﻣﺘﻚ ﻛﺘﻴﺮ ﻣﺘﻀّﺨﻤﺔ ﻳﺎ إﺑﻨﻲ، ﺑﺠﻮﺯ ﺗﻜﻮﻥ ﻣﻠﺘﻬﺒﺔ، ﺑﺲ ﻫﺎﻱ ﻇﺮﻭﻑ ﺍﻟﺒﻠﺪ .. ﺟﺮّﺏ ﺗﺴﺎﻓﺮ….
– أﻧﺎ ﻫﻴﻚ ﻗﻠﺖ. حملت ﺣﺎﻟﻲ ﻭ ﺳﺎﻓﺮت.
ﺍﻟﻜﺮﺍﻣﺔ ﺑﺮّﺍ ﺯﻋﺠﺘﻨﻲ أﻛﺘﺮ ..
ﻫﻮﻧﻴﻚ ﺍﻟﻜﻞّ ﻋم بذﻟّﻨﻲ ويهينّي .. ﻭ ﺗﻌﺎﻣﻠﺖ أﺳﻮﺃ ﻣﻌﺎﻣﻠﺔ .
ﺟﻴﺖ ﺍﺷﺘﻐﻞ ﺑﺸﻬﺎﺩﺗﻲ …. ﻣﺎ ﺣﺪﺍ ﺷﻐّﻠﻨﻲ …. ﻣﺎ ﺑﺸﻐﻠﻮﻧﺎ ﻧﺤنا، واذا شغّلونا عم يتمقطعوا فينا وبمعاشات مش ل حاملي شهادات.
ﺑﺲ أﻧﺎ .. ﻛﺮﺍﻣﺘﻲ ﺍﻟﻠّﻌﻴﻨﺔ ﻣﺎ ﺳﻤﺤﺘﻠﻲ ﺩﻛﺘﻮﺭ …. أﻧﺎ ﺩﺍﺭﺱ ﻭ ﺗﻌﺒﺎﻥ ع حاﻟﻲ، ومتعّب أهلي معي حتّى خلّصت. ﺑﺲ ﻭﻻﺩﻱ ﺟﺎﻋﻮا، ﻭأﻧﺎ ﺗﻌﺒﺖ.
ﺧﻠّﺼﻨﻲ ﺍﻟﻠﻪ ﻳﻮﻓﻘﻚ.
– ﻃﻴّﺐ ﻣﺎﺷﻲ ﻣﺘﻞ ﻣﺎ ﺑﺪّﻙ …. ﺑﺲ ﻻﺯﻡ ﺗﻌﺮﻑ …. إﺫﺍ ﻛﺮﺍﻣﺘﻚ ﺭﺍﺣﺖ …. ﻛﺘﻴﺮ ﺻﻌﺐ ﺗﺮﺟﻊ
– إن شاء اﻟﻠﻪ ﻋﻤﺮﺍاااااااااااااا ﻣﺎ ﺗﺮﺟﻊ.
– ﻣﺎﺷﻲ … ﺷﻼﺡ ﻭ ﺗﻔﻀّﻞ على غرﻓﺔ ﺍﻟﻌﻤﻠﻴّﺎﺕ ﻟﻨﺸﻮﻑ
……………………………..
– ﻛﻴﻒ ﺣﺎﺳﺲ ﺣﺎﻟﻚ
– ﻣﺎ ﺑﻌﺮﻑ …. ﻣﺎ عم حسّ ﺑﺸﻲ
– ﻣﻤممم … ﻃﻴّﺐ ﻫﻠّﻖ ﺭﺡ أﻋﻤﻞ ﻛﺎﻡ ﺗﺠﺮﺑﺔ ﻟﻨﺘﺄﻛّﺪ ﻣﻦ ﺍﻟﻨّﺘﻴﺠﺔ.
ﺭﻓﻊ ﺍﻟﺪّﻛﺘﻮﺭ إﻳﺪﻭ ﻭ ﺳﻠﺨﻮ ﻛﻒّ
– ﺣﺴّﻴﺖ ﺑﺸﻲ؟
– ﻻ
ﺷﺎﻝ ﺍﻟﺪﻛﺘﻮﺭ ﻛبّاية ﻣﻲ ﻭكبّها عل وجّه. ﻫﻠّﻖ؟
– أﺑﺪﺍً
– ﻛﻮﻳّﺲ. ﻃﻴّﺐ ﻫﻠّﻖ ﺭﺡ ﻓﻀّﻲ ﺳﻠّﺔ ﺍﻟﺰّﺑﺎﻟﺔ على راسك. ﺣﺴّﻴﺖ ﺑﺸﻲ؟
ﻭﻻ ﺷﻲ
– ﻛﺘﻴﺮ ﻣﻨﻴﺢ .. ﻋﻤﻠﻴﺘﻚ ﻧﺎﺟﺤﺔ .. ﻣﺒﺮﻭووووووﻙ .. ﺻﺮﺕ ﻫﻠﻖ ﻣﻮﺍﻃﻦ ﻃﺒﻴﻌﻲ ﺑﻜﺮﺍﻣﺔ ﻣﻌﺪﻭﻣﺔ ﻭﻣﺆﻫّﻞ ﺗﻤﺎﻣﺎً ﻟﻠﻌﻴﺶ ﺑﻬﺎﻟﺒﻠﺪ .
– ﺩﻛﺘﻮﺭ …. ﺩﻣﻮﻋﻲ …. ﺩﻣﻮﻋﻲ عم ينزلوا …. ﻟﻴﺶ عم إبكي أﻧﺎ؟
– إﻧﺖ عم تبكي ﻣﻦ ﺍﻟﻘﻬﺮ ﻳﺎ إبني ….
ﺣﺘّﻰ ﻟﻮ ﻛﺮﺍﻣﺘﻚ ﺭﺍﺣﺖ، ﻭﺣﺘّﻰ ﻟﻮ ﺗﻌﻮّﺩﺕ ﻋﺎﻟﺬّﻝّ …. ﺍﻟﻘﻬﺮ ﺟﻮّﺍﺗﻚ ﻣُﺴﺘﺤﻴﻞ ﻳﺮﻭﺡ ….
ﻫﻠّﻖ ﻣﻤﻜﻦ ﺗﺸﺘﻐﻞ ﺷﻮ ﻣﺎ ﻛﺎﻥ.
ﺭﺡ ﺗﻄّﻨّﺶ وتنسى ﺍﻟﻬﻨﺪﺳﺔ ﻭﺗﻘﺒﻞ ﺗﻠﻒّ سندﻭﻳﺶ.
ﻣﻤﻜﻦ ﺗﺎكل ﻛﻔﻮﻑ ﻭﺭﻓﺲ ﻭسب.
ﺭﺡ ﺗﻮﻗﻒ ﻋﺎﻟﺪّﻭﺭ ﻣﺘﻞ ﻏﻴﺮﻙ، ﻭﻣﻴﻦ ﻣﺎ أﺧﺪﻟﻚ ﺩﻭﺭﻙ ﻣﺎ ﺭﺡ ﺗﺘأﺛّﺮ.
ﺻﺮﺕ ﺑﺘﻘﺪﺭ ﺗﺸﻮﻑ ﻭﻻﺩﻙ ﺑﺎﻟﺸّﺎﺭﻉ عم يشحدوا
ﺭﺡ ﺗﻌﻴﺶ ﺑﺪﻭﻥ ﻛﺒﺮﻳﺎﺀ …. ﺑﺪﻭﻥ ﻋﺰّﺓ ﻧﻔﺲ ….
ﺑﺲ ﺭﺡ ﺗﺒﻜﻲ
ﺭﺡ ﺗﻀﻞّ ﻣﻘﻬﻮﺭ
ﻭ ﻣﺴﺘﺤﻴﻞ تنسى.
يلّلي ﻋﺮﻑ يا إبني طعم ﺍﻟﻜﺮﺍﻣﺔ ﺑﻴﻮﻡ ﻣﻦ الإيّام …. ﺑﻌﻴﺶ ﻛﻞ ﻋﻤﺮﻭ ﻣﻘﻬﻮﺭ على كرامته يلّلي ﺭﺍحت…