تبرير الجنوح نحو التطبيع

أول مرة بسمع تعبير باللغة العربية “احتكار الوطنية”، حتى مش سامع بهيدا التعبير بأي لغة تانية من اللغات لي بعرفها..

كيف بيكون احتكار الوطنية؟
إنو مثلاً الواحد بيشتري الوطنية من الأسواق وبيخزنها بمستودعات وبيرفع سعرها وبيتحكم فيها بالسوق؟

من وين بتجيب تعابيرك يا سيد نواف؟
من المحكمة الدولية؟
لا أظن إنهم استعملوه قبلك، يعني ما حدا سبق عليه..

كمان بدي خبرك،
الجهة يلي إنت بتقصدها ما بعمرها عملت شي اسمو احتكار وطنية… بل هيي بتستند للقانون اللبناني بالدفاع عن الوطن والوطنية. ومع ذلك لم تحاسب أي خائن وأي عميل لما حررت الأرض، وسلمت الموضوع للقضاء اللبناني يلي تساهل بالأحكام.. وبرضو ما حدا اعترض…
هل بتقصد بكلامك هيدا حماية المروجين لإنشاء علاقات مع العدو؟ وحمايتهم بفرمان منك شخصياً “وبتطج” ختم رئاسة الحكومة عليه؟
وإذا بتقصد جنابك إنو انتقاد التطبيع ورفض اللهاث خلف التفاوض مع العدو، والتخابر مع ادرعي وبنيانين وكل زمرة “شالوم”، احتكار للوطنية، فا بهالحالة بدك، يا حضرة القااااضي الدولي، تعدل الدستور وتغير القوانين يلي بتعَرِّف العمالة وبتجرم هيدي الأشكال وبتعتبرها خيانة وطنية. ساعتها بطريقك فيك تزيد عا مفاهيم اللغة العربية مفهوم جديد اسمو “احتكار الوطنية”، وفيك ساعتها تشرح إنو أي إنسان بيخون وطنو بيكون عم يعبر عن رفضو لاحتكار الوطنية.

معليش حضرة رئيس الحكومة الفاشلة، بدك تسمحلنا فيها، مش إذا كنت جايي من المحكمة الدولية برتبة قاضي دولي (مشكوك بنجاحو)، بيحقلك تخترع تعريفات جديدة كلها تخبيص بتخبيص، فقط من أجل تبرير سكوتك عن المطبعين والشتامين والمعربدين بأمن الوطن.

السبت ٢١ آذار ٢٠٢٦
علي خيرالله شريف