نواف سلام أول مرة عم يحس بالأمن والأمان بلبنان

بقلم علي خيرالله شريف

رئيس حكومتنا قالها من دبي، وما أدراك ما دبي: إنو
لبنان صار كلو أمان.
كل إنسان، أول ما يوصل عا مطار بيروت، صار يحس بأمان لأول مرة بتاريخ لبنان.
والدليل إنو ولا خليجي وصل عالمطار وانتقل عالأوتيل وسهر بالمرقص وتسوق بالداون تاون، وتسبح بأملاك الدولة البحرية المغصوبة… إلا حس بالأمن والأمان والنشوة كمان…

ورئيس الحكومة، من بيتو للسراي الحكومي، ومن السراي الحكومي لبيتو، صار يحس بالأمن والأمان، وما بقا يشوف حتى سيارات عالطرقات(لأن كل ما مر عم يسكر الطرقات كمان).

ورئيس الجمهورية، من بيتو لقصر بعبدا ومن قصر بعبدا لبيتو بقصر بعبدا، عم يحس بالأمن والأمان لأول مرة بحياتو كمان، بفضل نواف سلام يلي بسط الأمن عا كاااامل أرض لبنان.

ما تقلي في قصف بالجنوب وفي شهدا عم تسقط وأطفال عم تنقتل ومنازل عم تدمر…
هيدي بإيران نحنا ما دخلنا فيها.

ما تقلي في قصف بالبقاع والهرمل وجرود بعلبك
وتدمير منازل
وقتل ناس بالطيارات المسيرة والحربية.
هيدي كلها ما خصنا فيها، لأنها كلها بإيران.

بتقلي البقاع والجنوب والضاحية، بيشكلوا ٧٠ بالمية من مساحة لبنان،
بقلك ما خصنا، هول كلهم بإيران..

حبيبي، مساحة لبنان هيي مطرح ما بيوصل رئيس الحكومة ورئيس الجمهورية، ومطرح ما بيوصلوا المبعوثين والسياحيين، والرقاصين، والرشراشين، والباقي كلو بلا قيمة.
وحضرة الرئيسين عم يوصلوا عا مدريد وواشنطن وباريس والرياض والدوحة وابو ظبي وأنقرة ولندن وغيرهم… بأمن وأمان…
يعني شو بدي عددلك بعد؟
كلن هول آمنين، والأمن فيهم مستتب من يوم تعيين نواف سلام رئيس حكومة….
الله يطول عمرك يا بو عمر عا كل شي عملتو معنا من اتصالات وتعيينات وتشبيحات وخزعبلات، جبتلنا الرفاهية والترف والسعادة وقلة الشرف والبلادة، وجعلتلنا الأمن مستتب من بعبدا للسرايا وصولاً لعواصم جولات الرئيسين.
الأمن مستتب والشعب مستطب.
ونواف سلام أول مرة بيحس بالأمان بلبنان لأنو أصلاً أول مرة حضرتو بيعيش بلبنان ولما وقف العدو ربع قرن عا إجر ونص، حضرتو ما كلن. وهلق كل ما زاد العدوان دولتو عم يحس بالأمن والأمان.
هلق فينا نقول رجع لبنان لأيام زمان، للعربدة والفلتان.

الأربعاء ٤ شباط ٢٠٢٦