رداً على رسالة المجاهدين لبيئة المقاومة

*🔹 كتب حسين بزي:*

سمعت رسالة الشباب لإلنا وكوني من البيئة اللي توجّهتلها الرسالة بدي قول كلمتين تحديداً للمجاهد اللي قال “اصبروا شوي بعد”، ليك يا خيي ما بعرفك ولا بتعرفني ولا عرفت صوتك وانشالله توصلك رسالتي وبتقرأها، كلكن رسايلكن حلوة وأثرت فينا بس انت تحديداً هالكلمتين منك فاتوا على قلبي لجوا جوا جوا، حسّيت بقهرك وحسّيتك قديش حاسس بقهرنا وعم تطلب نطول بالنا وعم تستمهلنا شوية وقت، ليك يا قائد الله ومحمد وعلي والحسن والحسين والعباس والزهراء يحموك يا غالي، قاتل وما تطلّع للوراء، انجز مهمتك وما تفكّر فينا، اعمل شغلك وما تشغل بالك فينا، إنسى وجودنا أصلاً وأوعك للحظة تفكر إنو رح نكون إلك ولرفقاتك الإيد اللي بتوجعكن، قاتلوا واربحوا وارفعوا راسنا وبدناش منكن شي، عم تطلب منا نصبر بعد شوي؟ ليش أصلاً مين عطاك مهلة للتسديد؟ مين قلك في بينالتي عالتأخير؟ مين مننا إلو عين يحددلك وقت وإطار ويقلك معك ٩٠ دقيقة تجيب الماتش؟ ولك روح ربنا من عنده ينصرك ويبيّض وجك ويرفع مقامك ويعلّي مراتبك، ليك اني مواطن معتّر بحكي عن حالي وبقلّك اليوم نص بيتي راح وصار غير صالح للسكن أصلاً وشارعي تدمر ورفقاتي نصهم استشهدوا وبيت ستي اللي ربيت فيه بالضيعة انطحن، مش نص بيتي بل كل بيتي والرّينجر اللي بإجرك سوا، قال اصبروا بعد شوي قال! لبّيكم صبحاً ومساءً، لبّيكم في الأمس واليوم وغداً وبكل الظروف، الوطن مش أوتيل منتركه بس تسوء فيه الخدمة، البلد عُرض والعُرض غالي!!!

*#لبيكم*