حقي اورث

كنا نستحلي نلبس تياب العيد متل بقية البنات، كان والدي يعرف حاجاته هو وما يعرف او بالأحرى ما يعترف بحاجاتنا كبنات… ممنوع الثياب الملونة لحتى نلبس نفس الثياب عالمدرسة ولما نزور بيت جدي، ممنوع الفساتين او التنورة لانه ما بتنلبس عالمدرسة… كنا نستحلي نشتري متل رفقاتنا من دكانة المدرسة. ما كان فقير، كان موظف وعنده مية دنم ارض بس كان يخلّف كتير ويشتري حاجياته هو… كل سنة امي تخلف ولد… نقوله يا بيي نحن كتير محرومين عيشنا متل الناس عم ننحرج من تيابنا يلي بتعتق ورفقاتنا بيتغموزوا علينا… يقول: انا حر…

يلي بيحز بقلوبنا انه كان يشغلنا بعد الضهر وبالصيف بالاراضي وما يكافئنا بشي… يقبض حق الموسم ويشتري شي بيعنيله اله… كان ياخد الهدايا يلي تطلعلنا من المدرسة لانه كنا رغم كل شي مميزات. امي كانت تطلب منه يشتريلنا تياب بس ما تسترجي تصر لانه بتعرف انه رح يعند وخاصة انها قضت حياتها ببيت شبه فاضي وكنبايات مكسرة وما كان يغيرهم…

لما صرنا نشتغل صرنا نعوض عالبيت يلي كان مغارة فاضية وباردة، ما فيه سجاد، نجلد بعز الشتا… نجلي بالمي المقزقزة… ما عنا جاكيت لندفا لما نطلع… صرنا نشتري اشيا ليصير البيت قابل للعيش. كان يعصب علينا، يقول ما بدي أغراض بدي مصاري ويفرك صبيعه… حتى اجت اختي لتدهن البيت يلي كان بعده على طبقة الأسمنت من اكتر من ٢٠ سنة، قالها بدي المصاري وهددها اذا بتجيب شغيلة وبتعملهم اكل بدو يقلعها من البيت…

مرة اجا عم يطالبني بدو كل معاشي، قلتله انه ليش بتطلب من البنات والصبيان بتطنش عنهم، قالي عندي كتير ولاد… قلتله مش مشكلتي انت قلت انك حر تخلف…

ما كان كتير مفعوط بإخوتي الصبيان وخاصة انهم ما كانوا شاطرين بالمدرسة بس كان يعطيهم مصاري ليزبطوا وضاعهم ويدفع بدل وسايط ليوظفهم لانه بيعتبر انهم امتداد اله… يعطيهم هو حر بس يحل عن تعبنا…

استغلنا بصغرنا وكبرنا وآخر شي هرّب أراضيه للصبيان وخربت العيلة ومات…

#حقي_إورث

شاهد أيضاً

عبد الرزاق واحمد تحدثا في لقاء موسع في بلدة تكريت العكارية

أقامت حركة “الإصلاح والوحدة” لقاء” موسعًا في بلدة تكريت في محافظة عكار، في دارة المسؤول …