معقول!!!

سليمان حديفه

عم دقً ع باب الامل فيي
وتا افتحو غمضت عينيي
وكِترت ما سال الدم بالبلدان
عم نحسد العميان يا خيًي

معقول فينا تحجر الوجدان
وصرنا نشوف القتل غنيه
ومعقول نتقاتل على الاديان
ووراقها طبعه سماويه

معقول مِنا تهجر الايمان
وقلوبنا بالشر. مبليه
تا صار جوات الوطن اوطان
تاريخها صفحات وهميه

يا خجلة التاريخ من انسان
بيعيش ع خبز العبوديه
وحروف فكرو بكفة الميزان
ببيعهم مرات يوميه
ومقياس فخروً للبشر الوان
ودروب عمرو من الانانيه
بينام من مال الشعب سكران
وبيفيق ع جوع الحراميه

كتبني قصيده ما لها عنوان
ع سطور لو بحروف ممحيه
تركني ع صفحات الازل فنان
حامل جواز الحب جنسيه
وحتى ما مره من الزمن انهان
اكتب محل الاسم شاعر حب
واكتب محل الدين حريه