المناصب وتبعاتها

بقلم الكاتبة ريف سليمان

الإنسان اللي دايما بحاجة ليذكر غيره او الموظفين اللي معه او الناس اللي حوليه انه هوي مدير او مدير عام او رئيس او CEO او بيحكي بفوقية منصب و صوت عالي و بيقتات على تغذية ال ego تبعه ليحس باهميته و انه هوي عمل و ساوا او عنده سلطة و بيعمل، مع انك بتكون عارف انه مستوى ذكاه اقل بكتير من انه يمسك هيك منصب و هيك مسؤولية و انه غيره بيستحقا عن جدارة…
هل هيدا عنده عقدة نقص ام مشكلة نفسية ام مش مصدق حاله انه صار كامش منصب ؟ او هيي باللا وعي عنده عم بذكر نفسه اللي مش عم بتصدق انه شاف شي ما شافه مثلا …عز بعد فاقة الأمير علاقة! أم نوع من النرجسية؟ أم جنون عظمة؟

الفرق بين ال leader و ال boss هوي فرق من الارض للسما…
في مناصب بتعمل هالة للأشخاص و أشخاص بيعملو هالة للمنصب
وفي اشخاص بيكونوا قد المسؤوليات واشخاص بتكون المسؤليات اكبر منهم …والمناصب شو ما كان اسمها بتكون “مبهبطة” عليهم والقوة ما بحياتها بتكون بالصوت العالي القوة دائما بتكون بالحكمة …مش كل قوي حكيم بس كل حكيم قوي وصدق المثل لما قال بيبقى الولد ولد ولو حكم بلد…

ومن باب العلم العاقل هو اللي بيدرك انه تولي اي مسؤولية او موقع بأي مجال هو امانة وعبء على صاحبه لانه المسؤولية تكليف ومش تشريف …الواعي هو اللي بيعرف يتصرف لما يكون بأي موقع فيه مسؤولية سواء كبر او صغر وبيبقوا اجريه عالارض وبيعرف انه هو بموقعه اللي انوجد فيه لان ربنا حطه حتى يخدم ويساعد …وغير هيك هو نرجسية وعقد ودائما بتذكر قول ربنا بالقرآن “ان الله لا يحب كل مختال فخور”، لذلك صدق المثل لما قال لا يتكبر الا وضيع..

هيك اشخاص مستعدة تعمل اي شي و تطلع ع ضهر غيرا و تأذي لتوصل و تحافظ ع مركزا و خاصة إذا حسه بالخطر …
هيك اشخاص بخافو من الانسان اللي بفكر و بحلل حوليهم او ذكي و خاصة إذا حس انه هيدا الموقع بخطر او شاف ناس بتستحقه اكثر …او عندو شخصية لأنه بفرجيهم نقصهم…هيك اشخاص بدهم followers حوليهم و yes people ليغذو النرجسية تبعهم و يحسو بالسلطة…التواضع مش من شيمهم الا مع رب الشغل تبعهم… ربهم الأعلى …
لذلك أفضل طريقة للتعاطي مع هذه النماذج هي تركها واهمالها وعدم اعطائها اي اهمية حتى ترجع لحجمها الطبيعي ودائماً الدعاء بالشفاء والهداية هو خير وسيلة لخدمتهم وخدمة المجتمع من امثالهم..
ريف سليمان