عمر الحب ما بيهجر حبيب

الكاتبة زيزي ضاهر

روح ..
مطرح ما بدك روح
ما عدت حلمي
وسكة رجوعي
صرت ورقة خريف
كبرت وشاخت
عا حفاف الكذب
صارت أحلامك رماد
بس الحلم جواتي
محفور بحبر الوجع
لو حكي كان قلك
جوعانة ليك أحلامي
روح وخود معك
اسامينا الغريبة
مطارح الذكرى العتيقة
يمكن بعد ما تروح
تتذكر إن الوجع
مش موجود بالحلم
بس محفور بصرخة ألم
بعمرك وعمري
روح ل بعيد
وخود معك حلم العمر
مش انت لي كنت الي
روح الروح وتوأم الإلفة
مش شفافك اللي همست اسمي
ولا صوتك اللي صرخ فيني خليكي
روح عمطرح اللي ما بيوصلك صوتي
وببقى أنا حلم عاش فيك من دون ندم
وصوتك مهما غاب عني
ما بيصبح خريف منسي
ولا بيهجر رصيف قلبي
روح وانسَ وعدك إلي
واحرق بإيدك اللي كانت
بيوم لمسة وجودي
ذكرياتي وضحكة سنيني
روح ل بعيد بس قلبك معي
روح وافتكر انك بيوم
إنت اللي هجرت حلم الولدنة
وعفراشة الأحلام
رح إرسمك طير
غرب وطول رجوعو
والغربة مش حقها
تسرق فرحة رجوعك
روح ل بعيد وغير بريدك
وترك لي حلم شفتك فيه
بالعمر مرة
وسكر وراك بواب الماضي
بس قبل ما تخلص الأيام
رح خبرك سر مش موجود
إلا بقلبك وقلبي
بتموت كل الدني
بس انت وأنا
مش بيموت فينا
الحب اللي اتولد
من قبل ما تخلق
الدني