العار لكم ايها الحُكُام الفاسدين!؟…كيف دفعتم الفقراء والمستضعفين الى ركوب مركب الموت الأخير….

د. طلال حمود

ملاحظات هامّة للصديق المحامي حسن عادل بزي حول مركب الموت الأخير وخسارة اكثر من 95 شهيد من المدنيين معظمهم من الشباب الذين فقدوا الأمل بالعيش الكريم في هذا الوطن وجميعهم برقبة سلطة النهب والفساد والمحاصصة التي تتسلّط على رقابنا منذ اكثر من اربعين سنة وتغطّيها سياسات الفاسد الأكبر “حاكم مصرف لبنان رياض سلامة” ويعاونهم في ذلك نهم وجشع عصابات جمعية المصارف وكارتيلات المحروقات وكبار التجار المجرمين وحيتان المال ومافيات متعددة الأشكال والمهام في الصيرفة والتلاعب بسعر الدولار والمولدّات… وغيرها والذين اوصلونا جميعهم بالتكافل والتضامن الى هذا القعر الجهنمي والى هذه الحالة الميؤوس منها …
ولأنها صرخة كل مواطن لبناني اعيد نشرها مع تبنّي كل نقطة وردت فيها!؟
ومع تقديم التعازي الى اهلنا واخواننا في الشمال والى كل العوائل التي فقدت الأهل والأحبّه في هذه الرحلة التي لن تكون الأخيرة لأنّ نهج الفاسدين في هذه السلطة سيبقى ذاته ولن يبدّلوا قيد انملة في سياسياتهم وإستكبارهم وإنكارهم للواقع وللوقائع وفي حقدهم على هذا الوطن وشعبه وسعيهم فقط للمحاصصة وتحقيق المكاسب والمغانم ولتأمين مصالحهم الشخصية.. مهما كلّف الأمر وحتى لو كان الثمن قتل خمسة ملايين مواطن بهذه الطريقة او بغيرها.!؟…

ويقول الصديق حسن بزي في منشوره:
لفتتني منشورات عديدة تلوم المهاجرين عبر البحر وأنه كلفة السفر بتفتح مشاريع انتاجية بتخلي الشخص مرتاح نسبياً…

هيدي الفكرة تتماهى مع فكرة معك ليرة بتسوى ليرة…
طيب الأنسان والكرامة مجرد لقمة أكل؟

بتعرف شو يعني تعيش في بلد دون أمن ومحكوم من الزعران والشبيحة وكل يوم إطلاق نار وخطف ومشاكل وعراضات؟

بتعرف شو يعني ما عندك كهرباء بالوقت اللي متوافرة بمجاهل أفريقيا؟

شو رأيك أنه 80% من الشعب اللبناني ما عنده مياه خدمة حلوة وأنه فاتورة شراء المي تتخطى أضعاف قيمة راتبه؟

بدك خبرك عن الطبابة؟ ما في داعي لأنك بتعرف أنه الإنسان متل الكلب بعاملوه إذا ما معه fresh dollars.

أما المدارس والجامعات فحدث ولا حرج….
الرسمي تعطل وتدمر من 3 سنين،
وصار التعليم متاح فقط لأصحاب الأموال،
وبحسبة بسيطة إذا ابنك بدو يعمل طبيب لازم تتكلف عليه مبلغ 200 الف دولار أميركي عالقليلة.

بدك كفي أو اقتنعت؟ بذكرك بطوابير البنزين والخبز والدواء المفقود؟

موضوعنا أنه غالبيتنا ببطمح للسفر حتى يطمئن أنه التعليم والطبابة والكهرباء والمياه والاحترام والكرامة متوافرة… مش بس لقمة الأكل، ما الحيوانات بتاكل كمان.

كلمة أخيرة، الأمن العام من سنة ونص أمن 1،8 مليون جواز سفر بيومتريك، بس حكوماتك ما دفعت للمصنع الفرنسي، وهيدا السبب اللي عمل أزمة جوازات وخلى الناس تهاجر بالبحر مش عبر المطارات ، يعني من الآخر حكومتك ومرجعيتك الطائفية اللي حامية سياسيينك كلن شركاء بدماء هالأبرياء اللي راحوا يفتشوا على وطن بدل هيدي الزريبة اللي حاكمينها مجموعة مجرمين سفلة.

*المحامي حسن عادل بزي*
*د طلال حمود-ملتقى حوار وعطاء بلا حدود- جمعية ودائعنا حقّنا*