آخ يا بلد….

الشاعرة سناء زين معتوق

يوم فروج…يوم خبز…يوم أعاشة
سترونا بالشحادة والنِعم من هالقماشة
فوضى مزقت البلد
ووعود كذابة وغشاشة
ونحنا شعب غبي
شعب مذلول غاشي وماشي

هني دخلك شو بهمن
جعت..شبعت آخر همّن
الأكل والدوا بيتأمنلن
غير للأكل ما بيفتحوا تمّن

يا شعب مظلوم تعبنا تنظير
إرفض الذل انظلمنا كتير
حرر قيدك بطّل أسير
انتفض بوج الجوع والتعتير

قتلتو فينا الحلم يا دولة زعران
حاميها حراميها والحبل فلتان
الكل ضربنا بكف الخذلان
وآخر شي…لي ماعجبو…
يدق راسو بالحيطان

قديه منا نتحمل قهر
سكوتكن عن الفساد أكبر غدر
ما بيشفي جروحنا غير ثورة
ووقتا بنبني وطنّا من الصفر