طريق عنايا ما بدا بنزين..

لارا نون

شربل… طريق عنايا ما بدا بنزين… طالعين لعندك من جونية… من جبيل… من كل لبنان… سيراً على الاقدام… حافيين…
شربل… طريق عنايا ما بيهم اذا فيها صيدليات مسكرة… صيدليتك مفتوحة ليل نهار… بلا مصاري… بلا وصفة حكيم…
شربل… المنامة عندك ببلاش… ناس فارشين غراضن عالأرض ونايمين… عال check in فايتين لعندك بغصة… بوجع… وعال check out رايحين حاملين لمسة شفاء بتسوى الدني…
شربل… منِجي لعندك إيدينا فاضيين… مش مستحيين… مش مخجولين… ومنفل من عندك محملين مونة حب وايمان وثقة… ببلد ضاعت فيه الثقة…
شربل… من بعد ما تغط الطيارة في مار شربل… وقبل موعد الطيارة بدنا نزور ختيار عنايا…
شربل… بالوقت يلي باعونا بثلاثين من الفضة… بالوقت يلّي صادروا ارزاقنا… بالوقت يلي ما عاد معنا حق توابيت لندفن ولادنا… بالوقت يلي مفكرين الكرسي أبدية ومال الحرام أبدي… نسيوا… نسيوا يا شربل انو بهيداك الوقت ماتت الكراسي وعاش طبق القصب… وماتت الاسامي… وبقي اسم شربل…
انت بتعرف يا ختيار… بتعرف انو ما إلنا غيرَك… نحنا عايشين بالعتمة… صار وقت تضوي سراجك…
نحنا عايشين بالفقر… صار وقت تبارك هالكرمة…
نحنا عايشين بجهنم… هيك قالولنا يا قديس لبنان…
بس كيف… كيف ممكن الأرض الأحب عقلبك يقلبوها جهنم…
لبنان غصباً عنن رح يضل ارض القديسين… وشقفة سما…
ورح يجي نهار… ينطرد لوسيفوروس منها… لتحت… لجهنم…
لأنو… بكل بساطة… أرضنا بوجودك سما… وبعيدك سماوات… جهنم إلن… ولبنان القديسين إلنا… وببركتك رح يتدحرج الحجر… ونشهد للقيامة… يا ختيار لبنان… يا قديس الدني… كل الدني…
Lara Sleiman Noun ✍

•